Koeigedrag en waarop dit dui, is al goed gedokumenteer. Nou kan tegnologie elke koei volgens haar gesig monitor.
Ervare boere en hanteerders kan ’n mank, siek of afgeknoude koei vinnig raaksien. Die menslike faktor, arbeidskoste en tyd beteken egter dat konstante monitering onbetroubaar en onprakties is, veral by groot kuddes.
Moderne gesigherkenningsprogramme is reeds in slimfone ingebou en word wyd gebruik in sekuriteitstelsels en kameramonitering van groot groepe mense. Dit word nou ook ingespan om koeikuddes dop te hou.
Individuele bestuur soos dié verg normaalweg deurlopende monitering deur personeel wat weet waarvoor om uit te kyk in die kudde en op die rekenaarskerm. Dit sluit in hittewaarneming, kondisietelling, loopvermoë, hoeveelheid voer ingeneem en melk gelewer.
Verskeie soorte elektroniese moniteringstoerusting is beskikbaar, maar dit behels apparate wat elke koei moet dra en verskillende rekenaarstelsels en toe- rusting. Met die gesigherkenning en monitering word aktiwiteite fyn dopgehou vir tekens van beserings, siekte en of die koei op hitte is. Só sal die stelsel byvoorbeeld gou waarneem as ’n koei nie vreet nie of as sy mank loop.
Die tegnologiemaatskappy Cainthus het ’n paar jaar gelede dié konsep aan die landbou bekend gestel. Dié Ierse maatskappy is in Dublin, Ottawa (Kanada) en San Francisco (Amerika) bedrywig. Cainthus se kamera en herkenningstegnologie gebruik visuele inligting (video) om bruikbare data vir die boer saam te stel.
Onlangs het Cargill, ’n Amerikaanse maatskappy met uitgebreide belange in die landbou, besluit om in dié tegnologie te belê.
“Ons werk saam met Cainthus om die produk wêreldwyd bekend te stel,” sê mnr. Sriraj Kantamneni, besturende direkteur van Cargill se afdeling vir digitale insig. “Daarvoor konsentreer ons eerstens op markte waar die tegnologie maklik sal inskakel. Ons wil seker maak dat hierdie tegnologie so gou moontlik oral beskikbaar sal wees en ons sien Suid-Afrika as ’n belangrike mark.
“Suid-Afrikaanse boere wat in die Cainthus-tegnologie belang stel, kan na die webwerf gaan en hul kontakbesonderhede invul. Ons kommersiële span sal dan enige vrae regstreeks beantwoord.”
Die plan is om dié tegnologie eerstens in melkkuddes te gebruik, maar om dit later na ander veesoorte uit te brei. Die moniteringstelsel word reeds ingespan om gewasse te monitor. www.cainthus.com