DIÉ WEEK IN DIE LANDBOU
KLEINBOKKIE-WONDER
Die tonge was behoorlik los ná twee bale winterkleinbokkiehaar (tweede skeer) verlede week teen R520,50 per kilogram verkoop het op CMW se bokhaarveiling in Port Elizabeth. Dit is die eerste keer in vier jaar dat winterkleinbokkiehaar weer bo die R500/kg-merk verkoop. Dit was ook die toetrede van Studwolle, ’n Duitse wolverwerker, tot die sybokhaarbedryf. Dit sal nuwe mededinging om topgehalte-kleinbokkiehaar daarstel. Vir mnr. Weeber Truter en sy seun Martino, van Herold in die Suid-Kaap, was die prestasie besonder bemoedigend, veral omdat dit te midde van die knellende droogte gebeur het. Truter het aan mnr. Pierre van der Vyver, OVK se bestuurder vir bokhaar, vertel dat elke bok op sy plaas slegs oorleef omdat hy hulle met die hand en uit ’n sak voer. “Kos op die plaas is daar nie meer nie!” het Truter gesê.
HORINGWINKEL
Rhino Horn Trade Africa (RHTA), ’n aanlyn-handelsplatform wat die wettige handel in renosterhoring sal moontlik maak, is op Maandag 5 Maart bekend gestel. Volgens die Private Renostereienaarsvereniging (PROA) is die doel van die webwerf om ’n deursigtige, doeltreffende handelsplatform daar te stel, met ware kopers en verkopers vir renosterhoring wat op ’n omgewingsvriendelike manier bekom is. Die platform sal ook kopers en verkopers bystaan met die stawing van permitte en die nakoming van die onderskeie voorvereistes. Die RHTA werk saam met die veeartsenykundige genetiese laboratorium van die Universiteit van Pretoria by Onderstepoort om te verseker alle renosterhorings wat op die RHTA-platform verkoop word, is eers op die renoster-DNS-indeksstelsel (RhODIS) geregistreer. Besoek www.rhta.co.za en lees die volledige berig by bit.ly/2oOJiaf
ONAANVAARBAAR
Die Parlement het verlede week ’n stokkie gesteek voor planne van die Ingonyama-trust om bewoners se bestaande grondregte te skrap en dit met huurkontrakte te vervang. Nagenoeg vyf miljoen mense woon op die trustgrond. Die portefeuljekomitee vir landelike ontwikkeling en grondhervorming wou nie byt aan regter Jerome Ngwenya, die voorsitter van die trust se direksie, se regverdiging vir die besluit nie. Dit was naamlik omdat mnr. Lionel Mtshali, die premier van KwaZulu-Natal, ’n hofsaak verloor het oor die toestaan van behuisingstoelaes aan staatsamptenare wat in landelike gebiede woon. In daardie saak het die provinsiale regering en die vakbond gevra vir huurkontrakte in ooreenstemming met die behuisingsbeleid. Komiteelede het die trust daarvan beskuldig dat hy mense van hul grond wil ontneem sodat hulle huurgeld kan bekom.
ASTRONOMIES
Die pluimveeprodusent Astral verwag dat sy finansiële prestasie in die ses maande tot 31 Maart vier keer beter as ’n jaar gelede kan wees. Die maatskappy sê in ’n handelsverklaring op die JSE-nuusdiens sy wesensverdienste per aandeel sal na verwagting minstens 410% beter wees as in die ooreenstemmende tyd verlede jaar, toe voerpryse abnormaal hoog was. Die gunstige handelstoestande in die tweede helfte van sy 2017-boekjaar het in die huidige halfjaar voortgeduur. Anders as in vorige jare het pluimveepryse ná die afgelope Desembervakansie boonop stewig gebly. Voortgesette verbeterings in doeltreffende hoenderproduksie op plase het ook ’n bydrae gelewer.
BLY LANGER VRIENDE
Marktoegang vir Suid-Afrikaanse tuinbouprodukte in Indonesië is verleng tot 1 1 April 2021 nadat mnr. Amran Sulaiman, Indonesië se minister van landbou, onlangs ’n versoek van mnr. Senzeni Zokwana, sy Suid-Afrikaanse eweknie, in hierdie verband toegestaan het. Zokwana het al op 21 Julie verlede jaar gevra vir die verlenging om te keer dat die uitvoer van sekere vrugtesoorte onderbreek word wanneer die aanvanklike ooreenkoms, wat op 1 1 April 2016 aangegaan is, op 10 April vanjaar verval. Die marktoegang geld tans vir appels, appelkose, kersies, sitrus (pomelo’s, suurlemoene, nektariens en lemoene), tafeldruiwe, perskes, pere, pruime en pruimedante.