LANDBOUNUUS UIT AFRIKA 1 ZIMBABWE | Britte se beloftes maak skuld

Die Zimbabwiese kommersiële landbouunie (ZCFU), wat grootliks uit wit oudboere bestaan, sê Brittanje moet boere vergoed vir verliese wat hulle gely het in Zimbabwe se versnelde grond hervormingsprogram. Dié program het in 2000 begin nadat die Britse regering kop uitgetrek het uit sy verpligtinge om wit boere te vergoed wat histories baat gevind het by ’n rassistiese verblyfbeleid.

Meer as 250 000 swart families het grond ontvang wat voorheen in nagenoeg 6 000 wit boere se hande was. Die Zimbabwiese regering het onderneem en regsmeganismes geskep om dié boere te vergoed.

Mnr. Ben Giplin, direkteur van die ZCFU, sê Brittanje kan nie bekostig om die bepalings van die Lancaster House-ooreenkoms van 1979 te ignoreer nie, ofskoon dié ooreenkoms weinig detail bevat van hoe vergoeding moet geskied. Mnr. Boris Johnson, Britse minister van buitelandse sake, het reeds gesê sy land het Zimbabwe verloën deur nie dié ooreenkoms na te kom nie. – The Zimbabwe Daily

2 KENIA | Sak die son op mielieboerdery?

Boere in Kenia se “broodmandjie”-streke – Uasin Gishu, Trans Nzoia and Bungoma – het skynbaar genoeg gehad van mielies en slaan nou oor na onder meer suikerriet en tuinbou.

“Ek het nou genoeg gehad van mielieprobleme en gaan nie weer die gewas aanplant nie,” sê mnr. Japheth Omose van Trans Nzoia. Hy eksperimenteer die afgelope twee seisoene met ertjies en bone vir uitvoer, en het uit ’n vyfde van ’n hektaar onder ertjies en bone net soveel verdien as uit sy 4 ha mielies. ’n Ander voormalige mielieboer, mnr. Stephen Kemoi, verbou nou suikerriet vir ’n suikermeule wat aan hom plantmateriaal en misstof voorsien. Die neiging het dalk implikasies vir voedselsekerheid. – Xinhua