Plaasaanvalle: ‘Staat kan nie stry met dié feite’
IN minder as 100 dae vanjaar het reeds 109 plaasaanvalle en 15 plaasmoorde voorgekom. Dít is deel van die feite waaroor die Regering nie kan stry nie en wat wys landelike gebiede is in ’n misdaadoorlog vasgevang, sê die burgerregte-organisasie AfriForum.
AfriForum het op ’n nuuskonferensie in Pretoria gesê inligting wat na die internasionale gemeenskap versprei word, is gegrond op feite wat bevestig dat daar wél ’n ernstige bedreiging van eiendomsreg en menselewens in Suid-Afrika bestaan.
AfriForum glo hierdie bedreiging geld veral minderheidsgemeenskappe in die algemeen en veral wit boere in die besonder.
Die organisasie wil sy internasionale veldtog teen plaasmoorde en die miskenning van eiendomsreg in Suid-Afrika verskerp. Die nuuskonferensie volg nadat me. Lindiwe Sisulu, Minister van Internasionale Betrekkinge en Samewerking, vroeër gesê het AfriForum saai paniek in die internasionale gemeenskap deur onjuiste inligting te versprei.
‘GEEN GERUSSTELLING’
Mnr. Ian Cameron, AfriForum se hoof van veiligheid, sê “ons menSowat se word afgemaai”.
Hy sê hoewel die Suid-Afrikaanse Regering die afgelope week ontken het die landelike gebiede word deur ’n geweldskrisis in die gesig gestaar, bewys die getalle juis dat geweld in hierdie areas buitensporig erg is.
Hy voeg by dat marteling met strykysters, blaasvlamme, gesmelte plastiek en kookwater duur dikwels ure voort tydens plaasaanvalle. Hy sê daar is ook ’n beduidende toename in hierdie tipe aanvalle in die Wes- en Noord-Kaap.
Mnr. Kallie Kriel, uitvoerende hoof van AfriForum, sê die Suid-Afrikaanse Regering onderskat die internasionale gemeenskap se intelligensie deur voor te gee dat eiendomsreg in Suid-Afrika nie bedreig word nie.
Hy sê dit is onbetwisbare feite dat die regerende party (die ANC) onteiening sonder vergoeding as partybeleid aanvaar het en besluit het Suid-Afrika se Grondwet moet gewysig word om dit moontlik te maak.
“Vir Sisulu om nou gemoedere te probeer kalmeer deur aan te voer dat die Suid-Afrikaanse Regering volgens die Grondwet sal optree, bied geen gerusstelling nie, aangesien die ANC juis die Grondwet wil wysig.”
Mnr. Ernst Roets, adjunk- uitvoerende hoof van AfriForum, het daarop gewys dat volgens die nuutste beskikbare polisiesyfers meer as 1 700 plaasmoorde en meer as 12 245 plaasaanvalle oor ’n tydperk van 21 jaar plaasgevind het.
“Indien ’n mens in ag neem dat daar vir drie van daardie jare geen syfers oor plaasaanvalle bestaan nie, kom dit neer op ’n gemiddelde van 680 plaasaanvalle en 94 plaasmoorde per jaar. Dit is byna twee plaasaanvalle per dag en twee plaasmoorde per week oor ’n tydperk van 18 jaar.”
‘Dit is byna twee plaasaanvalle per dag en twee plaasmoorde per week oor ’n tydperk van 18 jaar.’