Net 15 jaar oor voor ’normale’ weer eindig
DIE hoër temperature wat reeds voorkom, het reeds ’n groot impak op die vee- en saaibedryf en dit gaan nóg groter word, voorspel prof. Francois Engelbrecht van die WNNR.
Volgens sommige modelle gaan Suider-Afrika in die algemeen droër word, maar Oos-Afrika natter. Ook Limpopo kan méér reën verwag weens toenemende tropiese siklone.
Hy sê weens die hoër temperature gaan die verdamping van oppervlakwater (damme) en grondvog ook styg, wat boerdery baie gaan raak.
Die tipiese hoeveelheid grondvog in die somersaaidele in Oktober (die droogste tyd) kan in die toekoms terugskuif na Mei of Junie, wat die veldbrandtyd sal verleng.
As ’n boer gewoonlik in November plant, sal die grondvog só laag wees dat planttyd eers ’n maand later gaan wees, wat ’n korter groeityd beteken.
MIELIES NIE BESTAND
Boere in die Vrystaat en Noordwes moet hulle voorberei op reënval wat aansienlik gaan verminder. Teen 2081-2100 gaan die temperatuur 5-9 °C hoër wees. Geen bestaande mieliekultivar is teen sulke toestande bestand nie. Dit geld ook die vleisbeesbedryf.
Sulke warm toestande kan die einde van dié bedryf in sommige dele van Suider-Afrika beteken.
“Ons het net sowat 15 jaar van ’n normale variasie in die klimaat oor voordat dit baie droër en warmer gaan word. Ons is dus op pad na ’n klimaatstelsel wat nóg moeiliker as tans gaan wees.”