VAN POLOKWANE NA PAPOEA
’N Ingenieurssaak van Polokwane, Elecmec Engineering & Power, het die neutbedryf van Papoea-Nieu-Guinee só beïndruk met sy kommersiële MacMartinneutkraker dat die maatskappy in Februarie ’n span tegnici daarheen moes stuur om ook ’n sorteer-en-wasaanleg te gaan oprig.
Die maatskappy se verbintenis met dié land het begin in 2015, ná sy paaie gekruis het met dié van mnr. Kim Jones, ’n Australiese landboukonsultant, op die Wêreld-makadamiasimposium.
Jones was in opdrag van die landbounavorsingsinstituut van Papoea-Nieu-Guinee op soek na ’n neutekraker wat Galip-neute kon kraak.
Galip-neute groei aan die boom Canarium indicum, wat endemies in Papoea-Nieu-Guinee is en al sedert die 1930’s daar verbou word. Die neute se struktuur en samestelling is soortgelyk aan dié van makadamianeute, wat beteken masjinerie wat vir makadamias ontwerp is, kan ook vir Galip-neute gebruik word.
Jones was van mening Elecmec se neutekraker was die aangewese werktuig om dié neute kommersieel mee te pel.
EERSTE TER WÊRELD
Die verwerkingsaanleg is deur die Australiese Universiteit van die Sonskynkus geborg as deel van ’n ekonomiese opheffingsprojek vir Papoea-Nieu-Guinee. Die MacMartin-masjien het só goed gewerk dat die projekleiers gevra het of Elecmec ook vir hulle ’n was-en-sorteermasjien vir die neute kan ontwerp en installeer.
Die hele aanleg is in Polokwane gebou en getoets voor dit weer uitmekaargehaal en na Johannesburg gestuur is. Daar is dit in kratte verpak en per skip na Papoea-Nieu-Guinea verskeep.
Drie tegnici is toe vroeg in Februarie soontoe om die aanleg weer aanmekaar te sit.
Die aanleg, wat die eerste in sy soort ter wêreld is, loop nou klopdisselboom. “Ons is trots om deel te kon wees van hierdie installasie,” sê mnr. Anton Cloete, direkteur van Elecmec Engineering & Power.