SA DURF NIE MEER OP SY LOUERE RUS
OPSKUD, Suid-Afrika, jou buurlande is besig om teen ’n flukse pas te groei.
Dit was een van die boodskappe van prof. Ferdi Meyer, direkteur van die Buro vir Voedsel- en Landboubeleid, op die Suid-Afrikaanse Voerkraalvereniging se onlangse konferensie by Kievits Kroon in Pretoria.
Meyer het tydens sy voorlegging – oor landboubeleggings in onsekere tye – gesê in teenstelling met die wanindruk dat Afrikalande se ekonomieë grootliks uit arm, plattelandse markte bestaan, groei Suider-Afrikaanse lande teen ’n snelle tempo.
“Die ekonomieë van Kenia, Zambië, Tanzanië en Malawi behoort almal oor die volgende 10 jaar met meer as 5% te groei, terwyl hul stedelike sentra toenemend die vraag na voedsel opdruk. Dit sal daartoe lei dat die totale voedselinvoer in Afrika suid van die Sahara vanaf $7 miljard (R83,8 miljard) tot $40 miljard (R479 miljard) per jaar gaan toeneem,” sê hy.
Die vinnigste groei lê in groente, diereprodukte, vis en vrugte. “Hierin lê daar ook vir Suid-Afrika ’n goeie geleentheid aangesien die grootste groei in onderlinge handel in die streek lê. Maar dan sal ons mededingend moet word.
“Zambië lewer reeds ’n oorskot beesvleis, hoendervleis, sojabone en mielies en die ander lande is nie ver agter nie. Ons sal dus ook ons mededingendheid moet opskerp.”
PRYSVOORUITSIGTE
Meyer meen dat die hoër pryse vir rooivleis mettertyd gaan konsolideer.
“Wêreldwyd was die neiging ’n laer voerprys met hoër rooivleispryse. Ons het egter begin sien dat wêreldpryse vir rooivleis begin terugsak namate meer rooivleis gelewer word. In Suid-Afrika het ons nou eers begin herstel van die droogte van 2015-’16, met die projeksie dat mieliepryse oor die volgende twee tot drie jaar sal toeneem van ’n laer vlak af, terwyl beesvleispryse meer sywaarts gaan beweeg.”
Daarna behoort plaaslike rooivleispryse met sowat 20% te groei. Dit sluit die uitvoermark uit.
“Daar is dus uitstekende geleenthede vir plaaslike produsente indien ons oor die komende dekade ’n groter uitvoermark kan bewerkstellig. Die pryse van graan en oliesade sal na verwagting sywaarts bly beweeg, terwyl rooivleispryse plaaslik gaan toeneem,” het Meyer gesê.
‘Daar is dus uitstekende geleenthede vir plaaslike produsente indien ons oor die komende dekade ’n groter uitvoermark kan bewerkstellig.’