Nuwe landboureus sien blink toekoms vir graanboerdery
DIE landbou-afdeling van die nuut saamgesmelte DowDuPont gaan ’n afsonderlike, genoteerde maatskappy met die naam Corteva Agriscience word.
Die multinasionale maatskappye Dow en DuPont, wat saad en landbouchemikalieë verskaf, het hul samesmelting verlede September bekend gemaak.
Dit is reeds met voorwaardes deur die Suid-Afrikaanse Mededingingstribunaal goedgekeur. Die nuwe maatskappy het vanuit die staanspoor gesê dat hy onder meer sy landbou-afdeling, bestaande uit DuPont-oesbeskerming, DuPont Pioneer en Dow AgroSciences, in ’n afsonderlike maatskappy gaan omskep.
Mnr. James Collins, bedryfshoof van die landbou-afdeling, het op besoek aan Suid-Afrika en Kenia gesê die naam is onlangs bekend gemaak en die datum vir totstandkoming is Junie 2019.
DowDuPont is op die New Yorkse aandelebeurs genoteer, waar Corteva waarskynlik ook genoteer sal word, hoewel die besluit nog nie bekend gemaak is nie.
Collins het Suid-Afrika en Kenia besoek as deel van ’n reeks internasionale besoeke om Corteva-personeel te ontmoet en terselfdertyd by boere meer oor plaaslike probleme te leer.
GROTER REIKWYDTE
Die samesmelting is in die verlede deur boere-organisasies gekritiseer wat vrees dat dit mededinging gaan verminder.
Collins sê vir boere is die voordele van die nuwe maatskappy dat hulpbronne saamgevoeg word en daar na interne koste en prosesse gekyk word om doeltreffendheid en produktiwiteit aansienlik te verbeter.
“Ons klante sal ervaar dat die nuwe maatskappy op ’n baie groter skaal werk en ’n groter globale reikwydte het. Dit skep vir ons geleenthede om kennis en inligting wyer te versprei en om seker te maak dat produkte ook hier in Afrika beskikbaar is.”
Hy sê boere sal ’n vollediger aanbod van produkte – en ’n diversiteit van gewasse – sien. Hy verwag dat meer nuwe produkte en oplossings vinniger gelewer sal word danksy die samevoeging van Dow en Du Pont se innoverings-, navorsings- en ontwikkelingsvermoëns.
VRAAG BLY GROEI
Hy is optimisties oor boere se vooruitsigte vir die volgende paar jaar. “Ons het vier of vyf werklik goeie produksiejare gehad. Boere wêreldwyd neem nuwe tegnologieë in gebruik en streef produktiwiteit na.
“Wat mense nie noodwendig besef nie, is dat daar terselfdertyd die afgelope vyf jaar meer graan as ooit tevore verbruik is: Die vraagkurwe is sterk.
“Ek voorsien dat dié sterkte gaan voortduur namate die bruto binnelandse produk wêreldwyd begin herstel, mense se dieet verbeter, meer proteïen in diëte ingesluit word en daar ’n groter behoefte aan graan ontwikkel.”
Hy verwag dat huidige omstandighede rakende kommoditeitspryse en vraag nog ’n jaar of twee kan voortduur, maar voorsien ’n sterker wordende vraag en sê ook: “Ons is globaal net een droogte weg van ’n effense tekort.”
Collins, wat Suid-Afrika al voorheen besoek het, sê hy is altyd beïndruk met plaaslike boere se aanvaarding van tegnologie, hul vermoëns en hul passie vir die landbou.