Akademie slyp jong landbouleiers
Die Syngenta Grain Academy bied aan jong, kommersiële graanboere ’n unieke geleentheid om saam nuwe paaie vir volhoubare voedselproduksie te skep.
Die Syngenta Grain Academy bied jaarliks ’n slypskool vir toekomstige leierboere aan. Dit word aangebied met die samewerking van Graan SA en die Universiteit van die Vrystaat se sakeskool.
Die akademie bied aan jong Suid-Afrikaanse boere die geskikte opleiding om suksesvol en volhoubaar te boer. Die program is gemik daarop om jong boere daarvan bewus te maak dat die landbou uit méér bestaan as plant en oes.
LEIERS VAN MÔRE
Jong boere word toegerus om leiding op hul plase te neem, asook in landboubesprekings en -forums en tydens onderhandelinge met die Regering.
Mnr. Thabo van Zyl, besturende direkteur van Thuso Holdings, sê sy studie het nie net sy leierskapsvaardighede bevorder nie, maar ook sy selfvertroue.
“Die kursusleiers was uitstekend, waarskynlik die beste in hul vakgebied. Danksy die kursus verbeter jy beslis as ’n leier in jou maatskappy, boerdery en huis. Ek het ook selfvertroue ontwikkel en my leierskapsvaardighede versterk.”
Dr. Rene Uys, gespreksleier van Thinking Fusion, sê
hulle gebruik biometriese stelsels om die kandidate te beoordeel.
“As gespreksleiers lei ons die kandidate op om oplossings te kry vir ingewikkelde probleme. Hulle kan die metodologie van probleemoplossing wat die akademie aanbied, ook in hul eie lewe gebruik om situasies te bestuur.”
Die program beklemtoon vier aspekte, naamlik persoonlike leierskap, leierskap van ander individue, leierskap van ’n groep, en hoe om ’n volgeling binne ’n span te wees.
Mnr. Solomon Tshongweni, alumnus van die klas van 2017, is van Villiersdorp in die WesKaap. Hy sê hy was bang om in die openbaar te praat, maar nadat hy die interaktiewe klasse bygewoon het, het hy sy vrees oorwin.
“Dit was moeilik om toesprake voor baie mense te lewer, maar die gespreksleiers het ons gehelp om ons gedagtes op ’n persoonlike vlak oor te dra en goeie verhoudinge op te bou. Ek is dankbaar vir die geleentheid, want ek kan nou in vergaderings praat en ander mense se sienings respekteer.”
Die vermoë om gemaklik in die openbaar te kan kommunikeer, is gevolglik vir Solomon die beste vaardigheid wat hy by die akademie geleer het.
BOU VERHOUDINGS
Die akademie beklemtoon dat doeltreffende bestuur geskoei is op die bestuur van mense en persoonlike verhoudings.
Mnr. Shane Buchanan, alumnus van die klas van 2017, het onlangs by sy familiebesigheid in Bergville, KwaZulu-Natal, aangesluit en hy wou graag sy kennis en vaardighede uitbrei.
Hy sê boere moet nuwe geleenthede en ervarings aangryp om dieper kennis en toepaslike vaardighede aan te leer sodat hul ondernemings volhoubaar sal bly.
“Die akademie is ’n klein, maar beduidende stap in die regte rigting vir die Suid-Afrikaanse landbou.
“As ons die vaardighede wat ons geleer het, aan meer mense kan oordra, sal die landbousektor goed groei.
“As mense aan die akademie blootgestel word, sal ons ’n landbouherlewing deur die hele Suid-Afrika en groot groei in ons sektor sien.”
TOEKOMS
Die akademie speel ’n belangrike rol in die vorming van jong, kommersiële boere.
Mnr. Abraham Vermeulen, besturende direkteur van Syngenta Suid-Afrika, is trots op vorige deelnemers se gunstige terugvoer en dat hulle uitsien na wat die toekoms inhou.
“Ek het onlangs gelees dat die wêreld waarin ons leef so vinnig verander dat dit wat jou suksesvol gemaak het, nie jou sukses waarborg vir die toekoms nie.
“Terwyl die graanakademie ons die geleentheid bied om van ons land se topboere te leer ken, bied dit aan ons ’n wonderlike platform om saam te leer en ons bedryf beter toe te rus met landbouleiers vir ’n veranderende wêreld.”