PRODUKSIE HERSTEL IN TWEEDE HALFJAAR

Melkboere het verlede jaar sowat 2,6% meer melk a sin 2016 gelewer. Dié herstel het gekom nadat produksie in 2016 met 0,5% gekrimp het.

Verlede jaar se groei was danksy groter produksie in die tweede helfte van die jaar. In Januarie vanjaar was produksie 5,6% meer as ’n jaar gelede en die groeineiging is nog baie duidelik.

Dr. Koos Coetzee, ekonoom van die Melkprodusenteorganisasie (MPO), sê in die organisasie se Februarieverslag oor markneigings verlede jaar se groei was danksy die gunstige melk tot voerprysverhouding, asook beter klimaatstoestande.

Sedert verlede Junie tot begin vanjaar was die melk tot voerprysverhouding meestal nagenoeg 1,8:1.

Baie goedkoper voer danksy die reusemielieoes het ’n groot rol gespeel, asook die feit dat die gemiddelde produsenteprys sedert Augustus 2017 sowat R5/liter was.

Volgens Coetzee het verwerkers gesê die hoër produksie, tesame met stadige groei in die vraag na produkte, kan produsentepryse in die somer laat daal.

Die vraag na vars melk het in die twaalf maande tot September verlede jaar volgens Nielsensyfers met 4% gedaal, maar die vraag na langlewemelk het met 2,5% gestyg. Laasgenoemde is ’n kategorie waar plaaslike produkte van tyd tot tyd met ingevoerde produkte meeding.

Die totale invoer van suiwelprodukte het verlede jaar met 42% gegroei.