KOFFIEVERBOUING SKUIF NA KOELER DELE

Klimaatsverandering en weerstandigheid teen swamdoders het Brasilië sy posisie as die wêreld se grootste koffieprodusent gekos. Mnr. Tim Buckland van Sabie Valley Coffee op Witrivier, Mpumalanga, sê koffieboere oor die wêreld heen moet na koeler wêrelddele soek om koffie te verbou. In dié opsig hou die boere van Viëtnam en Kambodja nou die troefkaart en het boere in dié lande hul koffieplantasies sodanig uitgebrei dat hulle nou meer koffie as Brasilië lewer.

Die prys van koffie word op die wêreld se groot effektebeurse bepaal – nes ander kommoditeite, soos goud en platinum. In Suid-Afrika is koffie egter ’n nisbedryf. Koffieboere, soos Buckland en sy vrou, Kim, is geneig om vertikaal in die waardeketting geïntegreer te wees.

Sabie Valley lewer tien ton koffie per jaar en droog, verwerk en verpak hul bone self. “Ons is dus nie afhanklik van die wêreldprys vir die onverwerkte produk nie, want ons voeg waarde toe en kan ’n puik produk teen mededingende pryse lewer.”

Buckland sê in Suid-Afrika is ondernemings soos hulle s’n op persoonlike diens tussen kopers en kwekers/verkopers geskoei. Mense besoek sy besigheid op koffietoere waar hulle die hele proses (van die bone wat uit die boord kom tot die koffie in hul koppie) kan sien. Sulke mense word gewoonlik lewenslange kliënte wat maandeliks koffie op hul webwerf bestel. Koffie word van Sabie Valley oor die hele Suid-Afrika heen verskeep.