BITTERSOET UITSLAG VIR VYFSTER-VEILING
HY het op beter pryse gehoop, sê mnr. Dries Visser, ’n bekende wildboer van Thabazimbi. Tog is hy nie ontevrede met die pryse wat hy vir sy wild op die Vyfster-veiling by Bela-Bela gekry het nie. Met ’n omset van nagenoeg R26 miljoen sê Visser ’n mens kan sien daar is nog onsekerheid in die mark. Van sy genooide verkopers het byvoorbeeld besluit om hul diere terug te hou nadat baie mooi Zambiese Matetsi-swartwitpens-kruisdiere skaars R35 000 stuk gehaal het.
“Ek neem hulle nie kwalik nie,” sê Visser."Dit is die eerste kalwers van ’n topbul wat baie meer werd sal wees in die verkoper se eie teelprogramme.”
Visser se Wes-Zambiese swartwitpense wat bekend is om hul swart maskers het egter goeie pryse behaal. Carla (met horings van 35"), ’n dogter van Madonna (wat self met ’n horingmaat van 37⅛" spog) het R240 000 behaal. Gina, ’n Zambiese swartwitpenskoei wat dragtig is van Busanga, ’n Zambiese bul met horings van langer as 50", het R210 000 gehaal.
Mnr. Peter Bellingan van Tambotie Floodlands het as genooide verkoper vir die eerste keer van sy teelmateriaal op ’n veiling beskikbaar gestel.
Sy buffels het goeie pryse behaal, met The Don, ’n sewejarige bul met ’n horingwydte van 47½" en bogemiddelde spiergewig, wat R2,6 miljoen behaal het. Zara, ’n koei (met horings van 37½ ") wat dragtig is van Sentala – ’n bul met ’n horingwydte van meeras50"–issaammet’nbulkalf van hom teen R2,7 miljoen verkoop.
Visser sê die veiling was vir hom ’n goeie aanduiding dat die vraag na teelmateriaal meer gesofistikeerd geraak het en dat kopers kieskeurig is oor waarop hulle hul geld uitgee."Die besonderse diere het goeie pryse behaal, al is dit nou nie vyf jaar gelede se pryse nie.”
Visser sê hy bly optimisties oor die wildbedryf. Hy het boere aangemoedig om die standaard van hul boerderypraktyke te verhoog sodat dit nie ’n gaping laat vir omgewings- en jagorganisasies wat Suid-Afrika oor sy wildteelpraktyke wil kritiseer nie."Daar is ’n ongunstige beeld van ons in die buiteland en ons moet dit regstel,” sê Visser.
— JASPER RAATS