Wildskool:
Staat maak jag op buffelboere
DIE Regering wil glo buffelboere bykom met die verskoning dat buffels siektes kan oordra, terwyl dit eintlik die wildsoort met die minste siektes is.
Dr. Alex Lewis, ’n wildkonsultant, het op die Aldamwildskool, wat deur die Lewendehawe Registrerende Federasie en Landbouweekblad aangebied is, gesê Indië is 2,7 keer groter as Suid-Afrika, met 83 miljoen buffels en ’n groot mark vir buffelmelk.
Ofskoon groot dele van die Indiese bevolking dus aan siektes blootgestel is wat deur buffels oorgedra kan word, bekamp buffelboere daar hul siektes egter baie doeltreffend. Die Indiese regering laat die verantwoordelikheid ook aan die boere oor om siektes te monitor. Hulle kry eenvoudige toerusting waarmee hulle buffels kan toets nadat hulle geslag is of gevrek het.
Lewis sê die Suid-Afrikaanse Regering moet ook die plaaslike boere vertrou om dit self te doen. Alle vee- en wildboere kan dit doen en saam verantwoordelikheid op plaasvlak aanvaar. Hulle moet ook veeartse betrek.
Niemand sal tog onverantwoordelik optree nie, want dan sal hulle self daaronder ly.
“Die grootste risiko vir siektes is nie wild nie, maar vee,” sê Lewis.
BOERE KAN BESTRY
Lewis sê die oplossings wat die Departement van Landbou, Bosbou en Visserye aanbied wanneer ’n siekteprobleem ontstaan, is dikwels die grootste probleem. Hoe gouer boere die verantwoordelikheid kry om beheer oor te neem en die probleem op te los, hoe beter.
Lewis sê dit is nodig om siektes te bekamp omdat dit mense siek of dood kan maak. Daar is egter nuttelose wette wat noodsaaklike wette aan bande lê, soos duidelik blyk uit die twis oor die staat se veterinêre prosedurele kennisgewing (VPN) vir die risikobekamping van buffelsiektes. (Lees “Staat se TB-plan kry teenspoed” hier onder.)
Lewis sê brucellose en tuberkulose is byvoorbeeld nie siektes wat tot buffels beperk is nie.
“Hou op om dit op regeringsvlak te bestry, maar laat boere self die verantwoordelikheid aanvaar, want hulle kan dit doeltreffend doen. Boere toets reeds vir brucellose by swartwitpense, sonder dat hulle gedwing word om dit te doen. Hulle aanvaar dit as hul verantwoordelikheid,” het Lewis gesê.
Buffelboere het reeds in samesprekings met die staat voorgestel dat die boere self vir siektes toets, “maar hulle (die staat) hou nie daarvan nie”.
PAD VORENTOE
Lewis meen die bedryf moet die aangeleentheid in die toekoms só benader: Alle buffeleienaars se besonderhede is nodig om ’n kommunikasieportaal te skep. Versamel die toetsprosesse vir siektebestryding. Beveg die VPN in die hof, maar volg konstruktiewe planne. Werk nou saam met die nasionale dieregesondheidsforum om maatreëls te volg om siektes te bekamp. Meld siektes aan by die Departement van Landbou. Steun navorsing oor tuberkulose en brucellose. Doen navorsing ná vorige uitbrekings. Kry daardie boere betrokke sodat almal daaruit kan leer. ’n Vroeë waarskuwingstelsel is nodig sodat boere van die uitbreking van dieresiektes verwittig kan word. Dit moet ook met die samewerking van die forum vir dieregesondheid geskied. “Ons wil nie paniek saai nie, maar as ons nie iets begin doen nie, is paniek ons voorland,” het Lewis gesê.
–