Rooivleis:

Boerbokvleis kry nuwe rolmerk

KLAS A-bokvleis – lammers – word vanaf 1 Mei vanjaar met blou ink gemerk, en nie meer met oranje ink soos tot dusver voorgeskryf was nie. Mnr. Pip Nieuwoudt, voorsitter van die Wes-Kaapse Boerbokklub, sê dit is uitstekende nuus vir die bokbedryf.

Sy reaksie volg op die onlangse aankondiging van die Departement van Landbou, Bosbou en Visserye in dié verband, wat gevolg het op ’n versoek van die Rooivleisprodusente-organisasie (RPO) en die SA Boktelersvereniging.

Die besluit is egter onderhewig aan voorwaardes. Produsente moet aan al die ander voorskrifte van die betrokke regulasies voldoen. Die besluit kan enige tyd teruggetrek word weens ’n geldige klagte en alle abattoirs wat kleinvee slag, onthef die departement van enige blaam weens nadele wat weens die toestemming kan ontstaan. Die regulasies sal binnekort in die Staatskoerant afgekondig word.

GESONDHEID

Nieuwoudt sê die Wes-Kaapse Boerbokklub beywer hom reeds geruime tyd vir só ’n stap.

Die volgende stap is nou om met supermarkgroepe en verbruikersorganisasies te onderhandel oor ’n premie op bokvleis, aangesien dit gesondheidsvoordele inhou bo ander soorte rooivleis.

“In dié stadium gaan ’n groot persentasie van bokvleis aan die geloofsmarkte, wat bereid is om ’n premie daarvoor te betaal. Ons wil hê supermarkgroepe en ander instellings wat die vleis in die toekoms bemark, moet ook ’n premie daarop hef.”

Hy sê die oranje rolmerk wat tot nou toe vir Boerbokvleis gebruik is, het geen bykomende inligting aan die verbruiker gegee nie. Dit het boonop gelei tot ’n stigma dat bokvleis taai is – “iets wat beslis nie so is nie”.

Nog ’n volgende stap vir die bokbedryf is om ’n gepaste benaming vir gehalte-bokvleis te kry wat byval by die verbruiker sal vind.

Die departement het besluit om die nuwe rolmerk vir eers deur dispensasie toe te pas totdat dit formeel in die regulasies opgeneem kan word. Die oorskakeling sal egter nie later as 1 Mei geskied nie.

Boerbokvleis word lank reeds uitgevoer na onder meer Brasilië, Argentinië, Amerika, Australië, China en ander Afrikalande, veral Tanzanië.