MNR. FRANS WIID

BY WIE HET JY DIE WAARDEVOLSTE LES OOR SKAAPBOERDERY GELEER?

By my pa, Fransie, het ek die waarde van reproduksie geleer. By my werknemers en plaasbestuurders: Die belangrikheid om behoorlik sorg te dra met die instandhouding van die geëlektrifiseerde grensheinings om hoë speenpersentasies te verseker. Ons kan dikwels by mense leer wat nie kan lees of skryf nie.

WAARAAN SKRYF JY JOU SUKSES TOE?

Ek het gelukkig vroegtydig besef dat die toekoms van veeboerdery van die bekamping van roofdiere afhang en het gevolglik die grensdrade geëlektrifiseer. Jy kan alles 100% korrek doen, maar dit help niks as jou diere gevang word nie. Die bekamping van roofdiere is die belangrikste faktor wat die veeboer se winsgewendheid bepaal. Dit kan die verskil tussen ’n suksesvolle en onsuksesvolle boer beteken.

WAT IS DIE VERSKIL TUSSEN SKAAPBOERDERY EN BESPROEIING?

Dit is moeiliker om die veefaktor suksesvol te bestuur as die besproeiing van gewasse. As jy nie moeite met die skape doen nie, straf hulle jou hard. Die besproeiing kan makliker beheer word.

WATTER HULPMIDDEL IS ONONTBEERLIK IN JOU SKAAPBOERDERY?

Beslis ’n selfoon, ’n elektroniese weegskaal vir skape in die voerkraal en elektriese omheinings op die veegrond.

WAT IS JOU RAAD AAN VOORNEMENDE VEEBOERE?

Gaan leer om roofdiere te bekamp. Sodra jy dit bemeester het, kan jy kom boer.