Ses redes om Landini se 7-reeks te kies Landini se 7-reeks-trekkers het ’n stylvolle, dog aggressiewe voorkoms. Dis ’n gespierde knaap in ’n snyerspak: sjarmant, maar met slaankrag en ’n hoë werksverrigting.
Met die nuwe Pro Drive-ratkas en beproefde Betapower-enjins bied die Landini 7-reekstrekkers alles waarmee boere probleme in die moderne landbou die hoof kan bied. Dié reeks voldoen aan die landboumark se hoogste verwagtinge en enige van die modelle in die reeks is ’n wenkeuse om die volgende ses redes.
1. LIGTER OP BRANDSTOF
Die Betapower-enjin lewer meer krag met minder brandstof. Die vier modelle in die Landini 7-reeks word aangedryf deur die 6,7 liter-Betapower-turboenjins met ses silinders, 24 kleppe, drukbuisinspuiting en lug-tot-lug-tussenverkoeling. Dit verskaf krag in die 116 kW- tot 138 kW-reeks. Die optimale elektroniese brandstofinspuiting en die verbeterde ontbranding sorg vir hoër kraglewering deur die nuwe enjins, terwyl brandstofverbruik verminder word.
2. RATKAS
Die Pro Drive-ratkas met spoelkas (shuttle) en kruiprat bied 40 ratte vorentoe en 40 truratte deur ’n sesgangratkas met vier kragskakels per gang. Die ratkas word elektronies beheer deur middel van drukknoppieverstellings wat op die multifunksie-armleuning van die sitplek aangebring is. Die ratkas het ’n
autoshift-funksie wat outomaties die regte ratkeuse in die land of op die pad selekteer.
3. KRAGAFTAKKER
Die kragaftakker sorg vir veilige en maklike werking. Die kragaftakker word elektro-hidroulies ingeskakel en bied ’n keuse van twee kragaftakkeraspenne met 6 of 21 glyspygroewe. Die kragaftakker is toegerus met vier spoedkeuses, naamlik 540, 540E, 1000 en 1 000E r/min. Die elektroniese beheer van die kragaftakker verseker altyd gladde inskakeling van werktuie of toerusting.
4. GESLOTE HIDROULIESE STELSEL
Die stelsel is toegerus met ’n hidrouliese suierpomp (PFC) wat uitsluitlik aan die eksterne hidrouliese kleppe ’n pompvloeitempo van 90 liter/min. bied om alle hidrouliese werktuie te beheer. Dit het vier afstandbeheerkleppe vir die 7-160 model, waarvan een elektronies beheer is en drie meganies.
Die 7-175 tot die 7-215 het vyf elektroniese afstandbeheerkleppe. Die driepunt- elektronies beheerde hysstelsel bied ’n hysvermoë van 7 200 kg by die 7-160 en 9 300 kg by die 7-175 tot 7-215. Die driepunthysstelsel is ’n KAT III.
5. GEMAK VIR OPERATEURS
Die ergonomiese kajuituitleg in die 7-175- tot 7-215-modelle is ’n ware tegnologiesentrum van waar die operateur die trekker met maksimum gemak kan beheer. Die kajuit is ontwerp om ’n veilige, geraasvrye en gemaklike omgewing vir die operateur te verseker, veral wanneer hy lang ure op die plaas en in die lande moet werk.
Die kajuit het vier hoekstutte en is gelaai met funksies, waaronder ’n sitplek met lugvering. Dit het ’n multifunksie-armleuning, ’n teleskopies kantelverstelbare stuurwiel, doeltreffende outomatiese klimaatbeheer, LED-ligte en onbelemmerde uitsig rondom die trekker.
6. KAJUIT VAN 7-160
Benewens die multifunksionele armleuning wat na die sypaneel verskuif is, het die kajuit van die 7-160-model dieselfde kenmerke as die ander vier modelle. Die ratkasfunksie is nou op die sypaneel, maar verskaf steeds die normale funksies omdat die ratkas in al die 7-reeks-modelle dieselfde is.