VERWERKERS MOET ‘VRYWILLIGE’ REËLS VOLG TOT REGERING BYKOM
DIE Regering doen ’n beroep op vervaardigers van verwerkte vleisprodukte om die “vrywillige” standaarde binne bestaande wetgewing te volg terwyl die opstel van tussentydse standaarde vir sulke produkte nog onder bespreking is.
Dit volg nadat die Regering te kenne gegee het geen standaarde bestaan vir verwerkte vleis nie. Dié produkte word gekoppel aan die uitbreking van listeriose wat reeds tot 191 sterftes gelei het.
Die Departement van Gesondheid het die bron van die uitbreking nagespoor tot produkte uit Enterprise Foods se verwerkings- fabriek in Polokwane.
Dr. Rob Davies, Minister van Handel en Nywerheid, het versoek dat standaarde vir hierdie produkte so gou as moontlik opgestel word. Intussen sal die Regering hom moet wend tot standaarde binne die bestaande wetgewing om verbeterde voedselveiligheid te verseker.
NIE IN WET
Dr. Juno Thomas is hoof van die sentrum vir enteriese siektes by die Nasionale Instituut vir Oordraagbare Siektes. Hy sê die direktoraat vir voedselkontrole van die Departement van Gesondheid het in die Parlement aangedui daar is binne bestaande wetgewing mikrobiologiese beperkinge vir die Listeria monocytogenes in verwerkte vleis wat eetgereed is. Die gebruik van die beperkinge word uitgespel in die Suid-Afrikaanse Nasionale Standaarde (SANS) 885.
Sy verduidelik in afdeling 27 en 28 van die Wet op Standaarde, Wet 8 van 2008, word aangedui hoe ’n standaard aangewend moet word. ’n Standaard word eers afdwingbaar wanneer daarna in wetgewing verwys word,
soos uitgespel in afdeling 28.
“SANS 885 word nie in die wetgewing gemeld nie daarom is dit ’n vrywillige standaard wat deur die bedryf ontwikkel en vir gebruik aangewend kan word.”
Volgens afdeling 2(1)b(i) van die Wet op Voedingsmiddels, Skoonheidsmiddels en Ontsmettingsmiddels van 1972 mag voedingsmiddels nie skadelike besmette patogene bakterieë bevat nie. Dit vereis dat die vlakke van die L. monocytogenes in produkte wat eetgereed is, soos verwerkte vleis, 0 cfu/25 g (kolonievormende eenhede per gram)
moet wees. Dis in ooreenstemming met die perke vir dié kosse wat in die Verenigde Nasies se Codex Alimentarius vervat is.
EEN BRON
Thomas het ook aangedui dat L. monocytogenes se ST6-stam nog slegs by die Enterprise Foods’ produksieaanleg in Polokwane gekry is. “Daar is geen bewyse dat daar meer as een bron van die uitbreking is nie.” Sy sê hoewel die Listeria-baterieë gevind is in sekere verwerkte vleisprodukte wat eetgereed is, wat deur ander kosleweraars – soos RCL Foods – vervaardig word en ook in omgewingsmonsters van die produksieaanleg by RCL Foods op Wolwehoek, gevind is, is dit nié die stam wat vir die uitbreking verantwoordelik is nie. Dit is ander stamme van die L. monocytogenes.
“Hoewel die teenwoordigheid van die L. monocytogenes, wat dus in dié produkte en produksieaanleg gevind is, ’n gesondheidsrisiko is, word hulle nie geïmpliseer as oorsaak van die siekte wat met die uitbreking verbind word nie,” sê Thomas.