WOLKWEKERS LEER BOEKHOU
BESTUURSLEDE van die OosKaapse kommunale wolkwekersverenigings het onlangs in Queenstown saamgetrek vir ’n twee dag lange kursus in basiese administrasie en boekhouding.
Me. Patti Myburgh, die Nasionale Wolkwekersvereniging (NWKV) se bestuurder vir finansies en bestuur, het aan streeksvoorsitters, tesouriers en sekretarisse van die kommunale verenigings verduidelik dié soort kennis is ewe relevant vir hul besighede en hul persoonlike finansies, asook hul betrokkenheid by kerke en skole.
Die kursus het klem gelê op die opstel van ’n begroting, die aanteken van maandelikse inkomste en uitgawes, asook die belangrikheid van ’n behoorlike liasseerstelsel om ’n geloofwaardige sakestruktuur te behou.
Daar was ook praktiese sessies om dié elemente te toets en te oefen.
Me. Bonita Francis, die maatskappysekretaris en woordvoerder, het ’n sessie oor algemene administrasie, die neem van notules vir vergaderings, asook hoe om agendas op te stel, aantekeninge by te hou en die belangrikheid daarvan om databasisse van belanghebbendes en lede te hou.
Die NWKV sê in ’n verklaring die boere se terugvoer was dat die uitbreiding van sulke opleiding na die vlakke van skeerskure en distrikte ’n groot bydrae sal kan lewer tot die bedryf se groei en ontwikkeling.