WILDBEDRYF VERDIEN R123 MILJARD/JAAR
DIE wildbedryf speel ’n belangrike rol in Suid-Afrika se ekonomie met ’n jaarlikse verdienste wat in 2014 reeds R122,7 miljard beloop het, het mnr. Ernst Janovsky, afgetrede hoof van Absa AgriBesigheid en tans verbonde aan die Janovsky-landgoed in Gauteng, op die Aldam-wildskool gesê.
Die eerste wildskool in sy soort is by die Allemanskraaldam onder die vaandel van die Lewen- dehawe Registrerende Federasie (LRF) met Landbouweekblad as mediaborg gehou.
Hy het gesê die inkomste uit wildboerdery bestaan uit R7,5 miljard uit jag, R10 miljard uit teling en wildverkope, R104 miljard uit wildtoerisme en R1,2 miljard uit vervaardigde wildprodukte.
Vir ál hierdie inkomstebronne moet die wildboer groot beleggings in onder meer wild, huis- vesting, ander infrastruktuur, toerusting en bemarking maak.
Internasionale jagters sorg vir R1,3 miljard van die inkomste uit jag. Altesame 8 950 buitelandse jagters het Suid-Afrika in 2014 besoek om trofeewild te skiet. Hulle het gemiddeld R138 000 per jagter bestee, waarvan R63 131 aan trofeediere was en die res aan onder meer daggelde en vervoer.
Die plaaslike biltongbedryf was volgens die 2014-opname vir R6,2 miljard verantwoordelik. Sowat 200 000 mense jag jaarliks teen R31 000 per persoon – R14 906 vir wild en R16 565 vir ander uitgawes. Dit sluit geld uit wat vir taksidermie betaal is.
Hy het gesê mense se redes vir jag is om in die natuur te wees, meer van die natuur te leer, trofeë te bekom, die vleis te benut, ’n geestelike ervaring te hê en tyd saam met vriende en familie deur te bring.
Die gewildste trofeewildsoorte is die springbok, rooibok, koedoe, blesbok en blouwildebees. Die meeste inkomste is uit die jag van leeus, koedoes en buffels verdien. Biltongjagters gee voorrang aan springbokke, rooibokke, blesbokke en vlakvarke, maar die jag van koedoes, gemsbokke, elande en springbokke sorg vir die grootste inkomste.