SLAKPRODUKSIE KÁN WERK

Die produksie van slakke vir gebruik deur mense bied ’n lewensvatbare nismark in Suid-Afrika.

Volgens mnr. Stanley Micaleff van Stanley’s Snails in Benoni, Gauteng, is die grootste voordeel van ’n slakboerdery dat dit betreklik min ruimte verg om ’n groot hoeveelheid slakke aan die mark te lewer. “Suid-Afrika het talle kleinhoewes waarop mense met slakke in buitegeboue kan boer,” sê hy.

Hy en sy vrou, Heather, boer al bykans ’n jaar lank met die gewone bruin tuinslak, Helix aspersa müller, deesdae bekend as Cornu aspersum, vir verskaffing aan restaurante.

Wilde slakke word in die Kaapse wingerde geoes, maar kan in die buitelug op stellasies geteel word. In die Micaleffs se geval word dit volgens ’n volwaardige teel-en-produsiestelsel binnenshuis gedoen.

Volgens Stanley is die oes van wilde slakke nie ’n volhoubare praktyk nie weens die seisoenale aard daarvan.

“Plaaslik kan met slakke in die buitelug op stellasies geboer word teen sowat 200 slakke/m2, terwyl binnenshuise slakproduksie sowat 400 slakke/m2 beloop,” sê Stanley. Hoewel die binnenshuise produksie van slakke duurder is as in buitelug, sê hy die groter hoeveelhede slakke vergoed meer as genoeg vir die aanvanklike onkoste.

Die Micaleffs verwerk ook self hul slakke en verskaf gaar, gekruide en vakuumverpakte slakke aan naweekmarkte.

—