Van oraloor

ONDANKS reusegroei in die avokadobedryf is die volle markpotensiaal van dié vrugte nog nie naastenby ontgin nie, sê mnr. Derek Donkin, uitvoerende hoof van die Avokadokwekersvereniging. Op ’n geleentheid in Johannesburg om die begin van die avokadoseisoen te vier, het Donkin gesê Suid-Afrika sal na verwagting vanjaar sowat 125 000 ton avokado’s oes, waarvan 50% uitgevoer en 50% plaaslik verbruik sal word.

“Suid-Afrika lewer jaarliks avokado’s op sowat 17 000 ha, maar die bedryf groei teen ’n duiselingwekkende tempo, met 1 000 ha nuwe aanplantings per jaar.”

Ten spyte daarvan meen hy die potensiaal, veral vir uitvoer, is nog nie naastenby ontgin nie. “As ons na die toenemende belangstelling in avokado’s in Amerika en veral China kyk, het Suid-Afrikaanse uitvoer nog net aan die oppervlak van hierdie groot verbruikersmarkte geraak. Die vraag na avokado’s in Amerika groei by- voorbeeld vinniger as die groei in jaarlikse avokado-aanplantings in Suid-Afrika.

“Ongelukkig voer ons nog nie avokado’s na China en Amerika uit nie, waar ’n toenemende stedelike bevolking besig is om ekonomies groot groei te beleef.”

AANLYNKOPERS

Donkin sê net die aanlynkopersgemeenskap in China is reeds sowat 300 miljoen mense sterk. “As ons dit met die Suid-Afrikaanse bevolking van sowat 60 miljoen mense vergelyk, wys dit jou die reusemarkpotensiaal wat daar vir plaaslike avokado’s bestaan.”

Hy sê die Suid-Afrikaanse Departement van Landbou, Bosbou en Visserye voer tans samesprekings met sy Chinese eweknie oor moontlike avokado-uitvoer na daardie land, maar die owerhede probeer eers marktoegang vir SuidAfrikaanse pere bewerkstellig.

“Ons het ná samesprekings appels na China begin uitvoer en nou is dit die peermark wat moet toegang kry. Wanneer dit afgehandel is, sal avokado’s aan die beurt kom. Ons is egter optimisties dat die proses binne twee of drie jaar afgehandel sal wees en dat Suid-Afrika dan ook die Chinese mark van avokado’s sal kan begin voorsien.”