Fort Hare wil ook veeartse oplei
VOORNEMENDE veeartse sal moontlik in die toekoms ’n opsie hê om hul opleiding aan die Fort Hare-universiteit in die Oos-Kaap te ontvang.
Mnr. Senzeni Zokwana, Minister van Landbou, Bosbou en Visserye, het onlangs die universiteit se kampus op Alice besoek om die proses om ’n fakulteit van veeartsenykunde te stig, aan die gang te sit.
Dit volg nadat die universiteit die departement genader het vir steun om nog ’n fakulteit vir veeartsenykunde in Suid-Afrika by dié universiteit te stig.
Zokwana het tydens sy besoek aangedui sy departement is deeglik bewus van die nypende tekort aan veeartsenykundiges in Suid-Afrika, veral ten opsigte van die staat se veeartsenydiens en -navorsing.
Suid-Afrika het tans een veearts vir elke 300 000 stuks lewende hawe, teenoor die een veearts per 100 000 diere wat die Verenigde Nasies se Voedsel- en Landbouorganisasie (VLO) aanbeveel.
Daarbenewens is daar ook heeltemal te min veeartse in landelike gebiede, wat groot probleme vir die Suid-Afrikaanse landbou skep.
WEERHOU
Zokwana sê die landelike gebiede word daarvan weerhou om deel te neem aan veeproduksie en die handel in lewende hawe omdat toeganklike en bekostigbare dieregesondheidsdienste nie beskikbaar is nie. Verder lê die oplossing vir uitbrekings van onder meer voëlgriep en listeriose in navorsing en ontwikkeling, en akademici speel ’n leiersrol in die vind van oplossings.
Volgens Zokwana is dit egter die Departement van Hoër Onderwys en Opleiding wat die nodige toestemming en akkreditasie aan die universiteit moet verleen, en die Departement van Landbou, Bosbou en Visserye sal slegs tegniese raad, asook aanbevelings ná die besoek, verskaf.
’n Tegniese span van die Departement van Landbou, Bosbou en Visserye sal die universiteit se vermoë en gereedheid om die kursus aan te bied ondersoek, asook die nodige aanbevelings doen.
Die besoek is voorafgegaan deur ’n vergadering in Oos-Londen oor die beoogde nuwe fakulteit. Dit is bygewoon deur Zokwana en prof. Sakhela Buhlungu, Fort Hare se visekanselier, tesame met die Land Bank, die Rooivleisprodusente-organisasie, die Suid-Afrikaanse Veterinêre Raad en ander belanghebbendes.