Nuwighede
Die dae van hope vuurhoutjies wat agter ’n jaghut by die gasgeiser lê en getuig van elke naweek van die jagseisoen se gesukkel om warm stortwater te kry, is verby.
Die Constant Temperature Gas Geyser van Delta Gas gebruik twee D-tipe flitsbatterye om self die gasklep oop te draai en die brander aan te steek as die warmwaterkraan oopgedraai word. Twee alkaliese batterye hou 230 dae voor dit vervang moet word, so geen elektriese aansluiting is nodig nie.
Die geiser het ’n proporsionele tweerigtingklep wat die gastoevoer reguleer om saam met die watervloei te werk. Die watertemperatuur sal dus selfs teen ’n vloei so laag as vyf liter per minuut konstant bly waar die gebruiker dit vooraf gestel het. Dié stelsel sorg ook vir optimale benutting van jou vloeibare petroleumgas en nie ’n gram word onnodig verbrand nie.
Die geiser van 16 liter kan ewe goed aangewend word om ’n klein badkamer met net ’n stort en wasbak of twee badkamers en ’n kombuis se water te verhit. In die geval van twee badkamers moet al die warm krane net nie gelyktydig oopgedraai word nie.
Die gasgeiser werk op sy beste as die verste kraan nie verder as tien meter van die geiser af is nie. Waar die geiser aan die buitekant van ’n gebou aangebring word, beveel die vervaardigers ’n beskermende kas aan om dit optimaal te help funksioneer in alle weerstoestande. Prys: R5 555