NUWE ERA VIR VERTIKALE BOERDERY
Die hoë kapitaaluitleg en talle hindernisse ten opsigte van marktoegang het die opgewondenheid wat ’n paar jaar gelede oor vertikale, binnenshuise boerderye bestaan het, uitgedoof. Volgens mnr. Willem Kamstra, mede-eienaar van Green Grow Up, is ’n vertikale boerdery gedoem tot mislukking as die boerdery nie ’n spesifieke mark vir produkte teen ’n aanvaarbare inkomste het nie.
“Green Grow Up het aanvanklik
begin met twee doelwitte voor oë. Eerstens wou ons boerderyeenhede aan boere verkoop en tweedens wou ons self produkte lewer. Weens die hindernisse om kleinhandelaars en kettingwinkels te oortuig om kontrakte met boere te sluit, was daardie sakemodel nie suksesvol nie.
“Green Grow Up is nou op die vooraand daarvan om ’n projek van stapel te stuur waar ons die waardeketting aansienlik verkort en die boer regstreeks met die eindverbruiker verbind. Só kan die waarde-aanbod aan die eindverbruiker gepoets word om volledig in sy of haar eiesoortige behoeftes te voorsien.
Dit gaan gepaard met gerief, betroubare produkte, gehalte en bekostigbaarheid. Die grootste voordeel in hierdie model is vir die boer wat ’n inkomste verdien wat die risiko en die finansiering van die hoë kapitaaluitlegkoste van ’n vertikale boerdery regverdig,” sê Willem.
In lande en stede waar die verdienste per kop van die deursnee-inwoner hoër is as wat dit in Suid-Afrikaanse stede is, is hierdie modelle reeds ’n geruime tyd lank ’n sukses, sê Willem. “’n Beleggingsbank van Japan, tesame met ’n vertikale boerderymaatskappy van Amerika, gaan probeer om só ’n model in 500 stede met bevolkings van meer as ’n miljoen mense oor die wêreld heen van stapel te stuur. Daar is nie ’n enkele Suid-Afrikaanse stad in dié projek se visier nie, juis omdat ons verdienste per kop nie aanloklik genoeg is vir die projek nie. Ek dink egter die tyd is ryp vir so ’n projek in Suid-Afrika en dat hierdie soort model nie net vir die rykes beskore is nie.”
Willem meen sy maatskappy se model sal binne die volgende 12 maande die lig sien.