SUKSESVOLLE VEILING IN DENEMARKE
Die mees onlangse veiling van Karakoelpelse in Kopenhagen, Denemarke, was uit ’n Namibiese oogpunt baie suksesvol. Goeie pryse is behaal. Dit behels ’n goeie verdienste vir die land waar die Swakarabedryf onlangs sy 110de bestaansjaar gevier het.
Volgens die Namibiese landbou-unie is 100% van die 41 809 pelse wat aangebied is, verkoop. Die prys het gemiddeld R476,38 per pels beloop. Dit is net 4,1% laer as die gemiddelde prys wat op die vorige veiling verlede September in Kopenhagen gehou is.
Die hoogste pryse vir die beste lotte swart pelse is deur Konstantinou Furs in Griekeland betaal. Pelskopers van England het die meeste pelse gekoop, gevolg deur Griekeland.
Die voorste Namibiese pelsprodusent was die KarasbergKarakoelstoetery wat gemiddeld R879 per pels ontvang het. Mnr. L.J. Kotzé het die beste onder die Suid-Afrikaanse produsente gevaar. Sy pelse is vir gemiddeld R588 per pels verkoop.
Daar is sowat 230 000 Swakaraskape in Suider-Afrika, waarvan 180 000 as produktiewe ooie gereken word. Hulle lewer ongeveer 120 000 pelse per jaar. Daar is dus groot ruimte vir verbetering en die Swakara-telersgenootskap is besig met planne om nuwe telers te lok en nuwe geleenthede vir waardetoevoeging te skep, soos ‘n Swakara-pelsfabriek op Keetmanshoop.
Die skape aard die beste in droë dele, soos Namakwaland, Boesmanland en die Kalahari.