50 JAAR GELEDE
BOER FLOREER OP 2,25 MORG IN KALAHARI
In die omgewing van Kuruman in die Kalahari waar beesboere in die afgelope droogte noodgedwonge van plase van ’n paar duisend morg moes padgee, boer mnr. G.P. Nel op ’n plasie van 2,25 morg (sowat 2 ha) by Seodin vooruit met groente.
Nel verdien al 28 jaar lank genoeg geld uit die groenteboerdery om ál sy kinders te laat leer en geriewe, soos elektrisiteit, ’n koelkas en ’n telefoon, in sy huis aan te bring.
Die klimaat is een van uiterstes, wat die kweek van groente allermins maklik maak. Drie boorgate op mnr. Nel se eiendom lewer genoeg water om sy groentelande nat te hou.
Hy spits hom toe op groente, veral geelwortels, beet en uie, wat hy deur die jaar kan kweek. In die somer plant hy ’n bietjie tamaties, groenbone en pampoene en maak hy ook geld uit druiwe en perskes.
Hy verkoop ál sy produkte regstreeks in groot maat aan groentewinkels en ook regstreeks aan die publiek op sy perseel.
Nel het ’n melkkoei wat die afvalblare en -stingels van die groente vreet en melk vir huisgebruik lewer.
Hy het net een werker in diens. Sy enigste werktuie vir die bewerking van sy grond is ’n tuinvurk, -graaf, -hark en stootskoffel. Hy dien kraalmis, kunsmis en landboukalk op die lande toe om die grond se vrugbaarheid te behou.