KORINGSTAMBOOM ONTSLUIT DANKSY SKARE SE SKENKINGS
’n Nuwe genetiese gids van 150 wilde verwante van moderne broodkoring stel telers van dié stapelgewas in staat om antieke eienskappe te gaan naspeur wat in veredeling verlore geraak het. Dit sluit weerstand teen siektes en gehardheid in.
Die samestelling van dié genetiese “adresboek” – met die titel Open Wild Wheat –is met aanlyn-skarefondswerwing gefinansier. Skenkers van akademiese instellings en die kommersiële bedryf oor 15 lande heen het $150 000 (sowat R124 000) ingesamel om vir die ontleding van die 150 wilde spesies se genome te betaal, berig die John Innes-navorsingsentrum in Engeland.
’n Internasionale konsortium onder leiding van wetenskaplikes van die John Innes-sentrum en die Amerikaanse Kansas-staatsuni- versiteit het dié gids ontwikkel.
Die 150 wilde spesies is almal verwant aan ’n veldsoort, genaamd Aegilops tauschii strangulate, wat oorspronklik uit die vrugbare halfmaan rondom die Kaspiese See kom. Die D-genoom in moderne broodkoring is uit dié gras afkomstig. (Die broodkoringgenoom is saamgestel uit drie volledige genoompilare – A, B en D – in die kern van elke koringsel.)
“Tienduisend jaar van veredeling en intensiewe teling het koring een van die voedsaamste, produktiefste gewasse gemaak, wat die grootste deel van die wêreldbevolking vandag voed. Dít was egter teen ’n prys,” verduidelik dr. Brande Wulff van die John Innes-sentrum. “Die geharde wilde voorvaderverwante het iets wat hul elite-kultivarneefs nie meer het nie: genetiese diversiteit waarbinne beskermende eienskappe, soos siekteweerstand, gevind kan word, asook verskeidenheid in blomtyd en mikro-voedingstowwe.”