DIE ANDER SÊ

Suid-Afrika moet sy “naïewe” weergawe van inflasieteikenstelling laat staan, lui ’n nuwe verslag van die Nywerheidsontwikkeling-dinkskrum, wat gesteun word deur die Departement van Handel en Nywerheid en die Universiteit van Johannesburg.

Mnr. Simon Roberts, medeskrywer van die verslag, sê ofskoon dit moeilik is om oor inflasie te praat ná die politieke storm wat me. Busisiwe Mkhwebane, die Openbare Beskermer, verlede jaar ontketen het met haar onregmatige aanval op die Reserwebank se inflasieteikenstelling, het dié beleid misluk. Hy meen dit het beduidend bygedra tot die omvattende, verhaasde de-industrialisasie van Suid-Afrika oor die afgelope twee dekades.

“Die hele wêreld het al wegbeweeg van die egte teikenstelling van inflasie. Dis ’n naïewe manier om inflasie te beveg wat sê inflasie bestaan slegs weens oormatige vraag,” sê Roberts. “Ons moet makro-ekonomiese beleid heroriënteer vir industrialisasie deur te sê jy moet insien waar inflasie eintlik vandaan kom.”

Hy meen die onlangse uiters lae inflasiekoers weerspieël eerder die sukses van die mededingingsbeleid.

“Kartelle het pryse hoog gehou. Aan die einde van die droogte het pryse in kosmarkte inderwaarheid gedaal. In die verlede het kospryse gestyg en nooit gedaal nie. Dit is ’n groot deurbraak vir markte. As jy dit kon voorspel het, behoort rentekoerse al verlede jaar te gedaal het.”