TOPWILDBOERE IN PEKEL OOR SNOTSIEKTE

NÓG twee wildboere is verlede week strafregtelik aangekla ingevolge artikel 11 (1) van die Wet op Dieregesondheid nadat hul buurman beeste weens snotsiekte verloor het.

Mnr. Petrus van Heerden van die plaas Kliprivier by Rankinspas het die klag teen twee van sy buurmanne aanhangig gemaak. Hy beweer hulle het nalatig opgetree deur nie billike stappe te doen om die verspreiding van dieresiektes te keer nie.

Landbouweekblad kon nog nie bevestig of die beskuldigdes al gewaarsku is om in die hof te verskyn of in hegtenis geneem is nie. Albei is van Alma, en is bekendes in die wildbedryf.

Van Heerden se klag volg op ’n soortgelyke saak in Noordwes waarin mnre. Theunis Marthinus Petrus Snyman, Werner Jan Stieger, Ronnie Ras en Dirk Zillem Venter verlede jaar in die streekhof

op Swartruggens verskyn het. Hulle is aangekla darvan dat hulle dat artikel 11 (1) van die Wet op Dieregesondheid oortree het.

Hul buurman het sedert 2006 al meer as 110 beeste weens snotsiekte verloor.

MILJOENE VERLOOR

Van Heerden sê die wiel is besig om teen eienaars van wildebeeste te draai nadat beesboere die afgelope 25 jaar miljoene rande weens snotsiekte verloor het sonder enige vergoeding of hulp.

Snotsiekte is ’n virussiekte wat deur blou- en swartwildebeeste gedra word.

Wanneer beeste dit kry, is daar

geen behandeling nie. Hoewel daar ’n entstof teen die siekte ontwikkel is, is dit nie tans in Suid-Afrika beskikbaar nie.

Die enigste beskermingsmaatreël wat wel bestaan, is om ’n buffersone van verkieslik een kilometer tussen beeste en wildebeeste te handhaaf.

Van Heerden beskryf die vervolgingsgesag se klagte teen wildboere as ’n welkome verligting vir die druk wat die siekte op beeskuddes plaas sedert snotsiektebestryding in die 1990’s afgeskaf is.

Snotsiekte is onlangs weer op die direktoraat dieregesondheid se lys van aanmeldbare siektes geplaas.