Agri SA verreken boere se bydrae
AGRI SA en sy affiliate kon in een boekjaar altesame R331 miljoen aan transformasieprojekte bestee. Hulle het 108 307 boere bygestaan, van wie 55 000 nuwelingboere was.
Dié inligting is vervat in Agri SA se nuut-ontwikkelde transformasieverslag, wat eerste in sy soort in die landbou is. Die organisasie het die verslag verlede week op ’n gesamentlike vergadering van korporatiewe lede en kommoditeitskamers in Pretoria bekend gestel.
Die data in dié verslag is vir die 2016-’17-boekjaar.
Mnr. Christo van der Rheede, adjunk- uitvoerende direkteur van Agri SA, het gesê hierdie prestasies toon dat Agri SA met R1 miljard sowat 330 000 nuwe boere kon gehelp het.
“Dit is maar net die begin van ’n proses. Ons glo daar sal aanstaande jaar ander bedrywe ook bykom sodat ons die beste praktyke in die hele landboubedryf met mekaar kan uitruil. Ons mikpunt is om die hele sektor te betrek – ook die bedrywe wat nie by Agri SA geaffilieer is nie.
BELANGRIKE GESPREK
“Die transformasieverslag vir 2018 is ’n uitstekende vertrekpunt om die belangrike gesprek rondom transformasie te voer. Daar is baie energie binne die landbousektor om transformasie te laat werk, maar ons moet ook maak dat die hulpbronne vir daardie doel tot werklik volhoubare boerderye lei.”
Hy sê in die proses om die opname te maak, was hulle op talle plase waar grondhervormingsprojekte misluk het. “Dit is verskriklik om die verwoesting te sien. Sodra kommoditeitsorganisasies met hul kennis en ervaring betrokke is, kan ’n mens die verskil sien.”
Mnr. Dan Kriek, voorsitter van Agri SA, het verwys na ’n opmerking van mnr. Solly Msimang, burgemeester van Tshwane, wat die genooide spreker op die geleentheid was. Msimang het gesê dit is nie sy taak om te boer nie, maar om die omstandighede so gunstig moontlik vir boere te maak om wel te kan boer.
“Die oplossings vir grondhervorming en transformasie lê by boere en binne Agri SA,” het Kriek gesê.
“Die Regering moet dit net moontlik maak dat ons ons by- drae kan lewer.”
DEELNEMERS
Bedrywe wat deel van die opname was, sluit in Katoen SA, die Nasionale Wolkwekersvereniging (NWKV), Graan SA en die Varkvleisprodusente-organisasie (Savpo).
Katoen SA het in 2016-’17 altesame 718 boere gehelp om 2 767 ha met katoen te beplant met R7,7 miljoen wat die Departement van Grondhervorming en Landelike Ontwikkeling bygedra het, en R1,2 miljoen van Katoen SA se geld. Die inkomste vir die kleinboere uit daardie katoen was R16,4 miljoen.
Die NWKV het in 2015-’16 sowat 10 000 kleinboere gehelp om wol van R233 miljoen te lewer. ’n Ram-uitruilprogram het gehelp om die gehalte van diere te verbeter en wolproduksie te verhoog.
Graan SA het in 2014 sowat R40 miljoen aan sy boerontwikkelingsprogram bestee en het 10 000 boere gehelp om graan op 148 641 ha te lewer. Altesame 3 177 boeredae is vir opkomende boere gehou.
In dieselfde boekjaar het Savpo R5,88 miljoen aan boerontwikkeling bestee om vier boerderye te ontwikkel en 22 boere op te lei.
‘Die oplossings vir grondhervorming en transformasie lê by boere en binne Agri SA.’