KARTELSAAK KOM DALK VANJAAR NOG VOOR
ALLE oë is tans op die Mededingingstribunaal vir uitsluitsel oor die opspraakwekkende kartelsaak wat die Mededingingskommissie in Maart verlede jaar teen 14 varsprodukte-markagentskappe van stapel gestuur het.
Sulke sake kan egter jare duur voor dit afgehandel word, hoewel daar hoop is dat die aangeleentheid vanjaar nog aangehoor kan word.
Die kommissie het in Maart verlede jaar op etlike maatskappye se kantore oor Suid-Afrika heen toegeslaan en op dokumentasie beslag gelê. Nadat die kommissie al dié inligting verwerk het, het hy die aangeleentheid vir vervolging na die Mededingingstribunaal verwys.
Volgens ’n woordvoerder het 8 van die 14 agentskappe tot dusver repliek gelewer op die Mededingingskommissie se klagte van kartelbedrywighede.
Twee agentskappe het gevra om meer besonderhede oor die kommissie se klagte. Nóg vier agentskappe het nog glad nie repliek gelewer op die bewerings nie.
Die Mededingingskommissie het verlede Oktober sy klagte teen die agentskappe na die Mededingingstribunaal verwys om verhoor te word.
GESPREKKE DUUR VOORT
Die woordvoerder sê die saakbestuurder onderhandel nog met die agentskappe wat nog nie op die klagte repliek gelewer het nie. Indien daar nie binnekort uitsluitsel daaroor kom nie, sal daar in ’n voorverhoor-proses ’n skedule en vaste spertyd vasgestel word wanneer die agentskappe hul repliek moet lewer.
Die saak sal egter nie verdwyn voor ’n volwaardige verhoor nie gehou is nie, maar die proses kan baie uitgerek word. Een so ’n voorbeeld, volgens die tribunaal, is die Computicket-saak, wat al vir bykans ’n dekade lank voortsleep. ’n Ander uitkoms vir die saak is as die aangeklaagdes, in dié geval die agentskappe, buite die hof skik. Volgens die agentskappe waarmee Landbouweekblad gepraat het, is dit in dié geval onwaarskynlik.
Dit is dus bykans onmoontlik om ’n datum vir die verhoor te bepaal, maar die tribunaal glo dit sal voor die einde van vanjaar nog kan plaasvind.