Komitee brom oor stokkiesdraai-minister
DIE Parlement se portefeuljekomitee vir landelike ontwikkeling en grondhervorming is ongelukkig omdat me. Maite Nkoana-Mashabane, die nuwe minister, nog net een vergadering tot die einde daarvan bygewoon het. ’n Ander keer was sy net 10 minute by ’n vergadering.
Nkoana-Mashabane is op 26 Februarie aangestel in die plek van mnr. Gugile Nkwinti, wat nou die Minister van Water en Sanitasie is.
Mnr. Mncedisi Filtane, UDM-LP, het gesê die minister woon nie die vergaderings by nie. Nkwinti het die vergaderings gereeld bygewoon, al was daar ook kabinetsvergaderings.
Die portefeuljekomitee vergader gewoonlik op ’n Woensdag. Die tweeweeklikse kabinetsvergadering vind ook op ’n Woensdag plaas. Die komiteelede sê Nkoana-Mashabane is selfs afwesig as hulle op ander dae vergader.
“Sedert sy aangestel is, het die minister by geleentheid net 10 minute by die komitee deurgebring. Haar afwesigheid het ’n impak op ons werk,” het Filtane gesê.
Mnr. Justice Mnguni, ANCLP en waarnemende voorsitter van die komitee, het gesê “daar is sekere rekenpligtigheid en standaarde” waaraan die minister moet voldoen.
Mnguni het die waarnemende direkteur-generaal van die departement en steunpersoneel van die minister aangesê om die boodskap aan haar oor te dra dat dit vir haar van groot belang is om die vergaderings by te woon.
Die departement sê weens ’n komiteevergadering van die Kabinet in Pretoria kon die minister nie die mees onlangse vergadering bywoon nie.