VERNUWE OF BOER UIT, SÊ JONGBOER
DIE magdom struikelblokke wat jong boere moet oorkom, maak dit soms vir hulle moeilik om die einddoel te sien. Met doelgerigte aanpassings en vernuwende denke kan hulle tog ’n gunstige bydrae tot Suid-Afrika en die landbou lewer.
Dít was die boodskap van mnr. Gideon van Zyl, voorsitter van Agri Noordwes se jongboerkomitee.
“Dinge soos ondeurdagte politieke uitsprake, wetteloosheid en selfbelang dra alles tot onsekerheid in die landboubedryf by, terwyl seisoenale toestande ook nie altyd na wens is nie.”
“Die reën was vanjaar laat in Noordwes, wat tot laat aanplantings gelei het, terwyl weidings in die provinsie oorwegend gemiddeld is met ’n lang winter wat voorlê. Ons lewe inderdaad in opwindende tye.”
Hy het gesê boere se toekoms lê daarin om deurentyd by omstandighede aan te pas en vernuwend te bly dink.
Volgens Van Zyl bied die risiko’s wat tans in die bedryf voorkom ook groot geleenthede. “Die grondkwessie is nou op die spits gedryf met onteiening sonder vergoeding en die verandering van die Grondwet wat aandag geniet. Internasionale druk is ook besig om toe te neem en vir ’n slag word daar sinvol oor die grondkwessie debat gevoer. Ons het die geleentheid om dié saak eens en vir altyd af te handel.”
“As ons konsentreer op die belangrike aspekte van ons boerderye, meen ek ons kan ’n gunstige bydrae tot ons land, ons mense en ons boerderye lewer.”
– Mnr. JP van den Berg (hier saam met sy vrou, Linné) van die plaas Buttermere in die Tosca-Vergeleë-omgewing is vanjaar Agri Noordwes se Jongboer van die Jaar. Hy is reeds verskeie kere as Aartappels Suid-Afrika se Moerkweker van die Jaar aangewys. Benewens die kweek van aartappelmoere, wat 70% van sy boerdery uitmaak, boer Van den Berg ook met Brahman-stoetbeeste, wild en kweek borseltjie-, bloubuffel- en witbuffelgrassaad. Hy bedryf ook ’n hoenderabattoir. Hy is die ondervoorsitter van Agri Moloporivier, Noordwes se Moerkwekersvereniging en die Tosca-Molopo-watergebruikerskomitee, asook lid van Agri Noordwes se jongboerkomitee. “Jong boere moet op die hoogte bly van die snelveranderende tegnologie in die landbou en dit in hul boerderye gebruik,” sê hy.