SO DUBBELDOEL SOOSPAPENVLEIS
Saaiboere kan die koolstof in hul grond met slegs plante opbou, maar met diere kan hierdie proses soveel vinniger plaasvind, sê prof. Chris Dannhauser, ’n veld-en-weidingbestuurspesialis.
Hy het op die Ottosdal-geenbewerkingsklub se jaarlikse bewaringslandboukonferensie gesê die dubbeldoelwaarde wat weidinggewasse tot ’n kontantgewassaaiery kan toevoeg, word nog te veel onderskat. Dis as ’t waarde so goed soos pap en vleis.
Weidingdekgewasse wat op ’n rusland tussen kontantoeste deur geplant word, verbeter grond deurdat dit organiese materiaal voorsien, stikstof in die grond verhoog, voedingstowwe vinniger sirkuleer en erosie en verdigting verminder. En met die regte keuse van plantsoorte kan dit bowenal weiding van ’n hoë gehalte bied.
Sorghum kan byvoorbeeld op droëland 3-12 ton per ha lewer, waarop een tot drie grootvee-eenhede (GVE) per hektaar 100 dae lank kan wei. Onder besproeiing kan sorghum 10-18 ton materiaal per hektaar lewer, waarop drie tot ses GVE per hektaar 100 dae gehou kan word.
KYK NA BASTERBABALA
Basterbabala kan ook in die plek van sorghum oorweeg word. Dit produseer dalk minder as voersorghum, maar bied steeds heelwat organiese materiaal en het ’n uitgebreide wortelstelsel wat dit droogtebestand maak. Voorts onderdruk dit aalwurms en dit lewer ook geen blousuurprobleme op nie.
Navorsing by Mokopane in Limpopo het vergelykende produksiesyfers op droëland opgelewer, soos in die TABEL gesien kan word. Dit was met reënval van 559 mm vir die jaar, waarvan net 52 mm in die vier maande van Julie tot Oktober geval het.
Chris sê sy ondervinding wys die grootste probleem met die vestiging van wintervoergewasse op droëland is te min vog in die lente en vroeë winter. Kyk dus wat jou gebruiklike herfsreënvaltotaal is in Maart, April en Mei.
HAWER EN KNOLLE
Wat weidingdekgewasse vir die winter betref, sê Chris knolgewasse vaar in die algemeen goed as pasmaat vir hawer. Dit kan ’n belangrike bydrae in geenbewerkingstelsels lewer om voedingstowwe te sirkuleer en verdigting op te breek. Diepwortelrape kan BO: LINKS: Landbouweekblad in Februarie geplant word as voer wat vinnig groei. Nooitgedacht-radyse kan in April geplant en van laat Junie tot middel Augustus bewei word. Mammoth Purple Top-rape, wat goed vaar op ligte sand- tot leemgrond, kan in Mei geplant word en van laat Augustus tot Oktober weiding verskaf. chriswei@vodamail.co.za; 082 873 4736.