WEES BEDAG OP AALWURMS
Aalwurms raak ’n ál ernstiger probleem, wys ontledings van laboratoriums by Klapmuts, die Noordwes-Universiteit en die Landbounavorsingsraad (LNR) se Instituut vir Graangewasse.
Dr. Sonia Steenkamp van die instituut het tabakboere op ’n inligtingdag by Schoemanshoek in die Klein-Karoo toegespreek.
Sy het daarop gewys dat plantparasitiese aalwurms by tabak in uiters droë of nat toestande geneig is om ’n groter probleem te wees. Hoewel hulle in die winter betreklik onaktief is, lê die eiertjies en wag vir die somer en nuwe aanplantings om uit te broei.
“Ons sal nooit ontslae raak van aalwurms nie. Al wat ons kan doen, is om die aalwurmbevolking in ’n land se getalle só te verlaag dat die skade wat hulle aanrig, nie die oes benadeel en gevolglik die boer se sak raak nie.”
Sy het gewaarsku dat boere en landboukundiges dikwels aalwurmsimptome met versuiptoestande, voedingstekorte en ander plantsiektes verwar. As dit dan wel aalwurmskade blyk te wees, is dit feitlik altyd te laat om iets daaraan te doen.
Simptome verskyn skielik en kom altyd in kolle voor. Besmette plante se blare vergeel, die plante is soms verdwerg en kan verlep lyk ten spyte van genoeg water in die land.
Biologiese bestrydingsproewe deur die firma Universal Leaf naby Oudtshoorn is ook bekyk. Dié proewe is deur mnr. Janno Koen, streeklandboukundige, begin om produkte wat dié plaag biologies kan bekamp, te identifiseer en hul potensiaal te bepaal.
Hoewel chemiese middels baie doeltreffend is, word van hierdie produkte weens hul giftigheid aan die mark onttrek. Universal Leaf laat sy verskafferboere byvoorbeeld net toe om Velum (reg.nr. L9565, Wet 36 van 1947) te gebruik.
Die sukses van biologiese bekamping sal ook deur die koste bepaal word.