Kry ’n plan en hou daarby
Van die wêreldpolitiek tot die ekonomie beleef onsekerheid. Wees daarop voorbereid.
Diegene wat na hulle beleggingstate vir Maart kyk, gaan ’n groot verrassing kry. Die skokke op die internasionale markte het ook na ons plaaslike aandelebeurs oorgespoel. Gevolglik is verlede jaar se groei in die meeste gevalle totaal uitgewis. Dit beteken trouens dat ons vir die afgelope vier jaar feitlik geen groei op ons markte gehad het nie.
Die vraag is: Waarheen nou? Moet ons ons geld in die bank sit en op die rente se opbrengste vertrou?
Dié tydperk van geen groei is nou een van die langste waarin ons mark nie werklik rigting gehad het nie. Finansiële markte was egter nog altyd onvoorspelbaar.
Dit is dus onmoontlik om te sê of ons aan die einde van hierdie onsekerheid is en vorentoe goeie groei kan verwag. Dit is onseker wat pres. Cyril Ramaphosa gaan doen om die Suid-Afrikaanse ekonomie aan die gang te kry. Niemand weet ook wat met grondonteiening gaan gebeur nie. En die beroepswedders gee nie die SAL óf Eskom juis die voordeel van die twyfel nie.
Politieke onstabiliteit is wêreldwyd aan die orde van die dag. Maar om bloot al jou geld in ’n bankrekening te plaas, is ook nie altyd so veilig as wat jy dink nie. Daar is banke wat onder kuratorskap geplaas word.
BLY BY JOU PLAN
Beleggingsbeplanning gaan dus nie net oor die kies van ’n fonds wat in die volgende jaar die beste gaan presteer nie. As jou finansiële beplanner met elke hersiening bloot jou fondse verander, moet jy weet daar is fout en dan moet jy dalk met iemand anders praat.
Maak seker wat jou plan vir die belegging is. As jou plan is om volgende jaar met vakansie te gaan, is die wyse waarop die geld belê moet word heeltemal verskillend van hoe dit belê moet word as dit vir jou aftrede oor 20 jaar bedoel is. Hierdie verskil is ongeag jou risikoprofiel, want jou behoeftes en beleggingstermyn is die belangrikste faktore.
Omdat die markte so onseker is, kan ons nie kanse waag met enige beleggings wat binne die volgende twee jaar gebruik moet word nie. Dit sluit ook dié dele in van jou belegging wat onttrek gaan word vir die doel van ’n inkomste. Dié gedeelte behoort derhalwe in kontant of geldmarkbeleggings gehou te word.
Die geld wat binne drie jaar tot ses jaar benodig word (kapitaal- en inkomstebedrae), kan in vasteopbrengsfondse met ’n lae risiko geplaas word. Hierdie fondse is steeds twee derdes in kontantbeleggings, maar die een derde wat in aandele is, bied die potensiaal om oor die volgende drie jaar ’n bykomende groei te gee as die markte begin spoed optel.
Geld wat jy nie binne die volgende ses jaar gaan gebruik nie, behoort nie in kontant te wees nie. Hierdie beleggings moet soveel as moontlik in aandele belê word. Die opbrengs daarvan moet oor ’n tydperk van sewe jaar gemeet word.
Dit is nou tyd om winterbolle te plant. Ek weet hulle gaan in Augustus blom. Ek grawe hulle derhalwe nie elke dag uit om te kyk of hulle wortels ontwikkel het nie. Ek vra ook nie hoekom hulle nog nie blom net nadat ek hulle geplant het nie. Ek wag tot Augustus wanneer my blomtuin pragtig gaan lyk. Dit is dieselfde met jou langtermynbeleggings.
BUITELAND OF NIE?
Danksy die Begrotingsrede in Februarie kan ’n mens in jou aftreefondse ’n bykomende 5% na die buiteland toe skuif. Op lang termyn moet hierdie ekstra 5% wél geskuif word. Dit maak nie sin om al jou eiers in die plaaslike mandjie te hou nie.
Wanneer ’n mens egter kyk na al die chaos waardeur Suid-Afrika die afgelope tien jaar is, lyk die toekoms plaaslik baie rooskleuriger. Baie plaaslike maatskappye is ook geposisioneer om voordeel te trek uit enige verbetering in die ekonomie.
Dit lyk asof die probleme in die buitelandse markte net in die beginstadium is. Onsekerheid neem toe en pres. Donald Trump van Amerika se Twitter-boodskappe help nie om die onsekerheid te verminder nie.
’n Klem op Suid-Afrikaanse markte kan dus oor die volgende jaar of twee ’n beter opbrengs lewer.
Die belangrikste is egter om seker te maak jy het ’n plan. As jy nie een het nie, kry ’n finansiële adviseur wat vir jou ’n plan sal bou. As jy wél ’n plan het, kyk of die plan nog op jou van toepassing is. As dit is, haal diep asem en hou by jou plan.
Adv. Ronald King is hoof van strategiese navorsing by PSG. Ronald.King@psg.co.za