DIE DRIE-IN-EEN KLUB
By The Country Club in Johannesburg is daar nie net twee topklas 18-putjie-bane nie, maar ook ’n pragtige syferdriebaan met nege putjies.
GHOLF
Dis eintlik jammer meer klubs het nie genoeg plek vir ’n ekstra negeputjiebaan nie. By The Country Club in Johannesburg is die kleiner baan gewild as ’n opwarmingsronde of wanneer daar aptyt is vir nóg ’n paar gate ná 18 putjies. Die negeputjiebaan, met putjies wat wissel in lengte van 70 m tot 120 m, is ook ideaal vir beginners of juniors.
Die klub se hoofbaan is die Woodmead-uitleg, waar die PGA-kampioenskapsbyeenkoms al aangebied is. Die baan beklee tans die 23ste plek op die Golf Digest se ranglys vir SuidAfrikaanse gholfbane. Die ander baan, Rocklands, beklee die 52ste plek. baie bome, lang putjies en baie water. Daar is ’n goeie verskeidenheid putjies. Sommige is afdraand, party opdraand. Die heuwelagtige terrein bied ook ’n mooi uitsig oor die omgewing. Fred Hawtree het die oorspronklike uitleg beplan, maar sedert die baan in 1970 geopen is, is dit gereeld deur Golf Data vernuwe. Die syfer drie-putjies se lengte wissel (van 160 m tot 180 m). Die sestiende putjie – 490 m – is die langste. Die kort vierde (171 m) is ’n moeilike syfer drie, terwyl die sewentiende, ’n syfervierputjie van 381 m wat al langs die meer lê, dalk die beste putjie is.
Vir die gewone speler is dit baie speelbaar, maar spelers wat lang houe slaan, het heelwat kanse om voëltjies aan te teken.
The Sandwedge, die tee-hut, word as een van die bestes in Suid-Afrika beskou. Onthou net, jy soek moeilikheid as jy nie jou pet afhaal voor jy daar instap nie!
Waar Woodmead boomryk is, is Rocklands in inheemse bosveld uitgelê. Daar is egter genoeg waterhindernisse. Albei bane is ryk aan natuurlewe en hier kan jy werklik vir ’n rukkie aan die stad se gewoel ontsnap. Die beroepspeler is Richard Fulford. 011 202 1600.