Vanjaar is dit ’n eeu sedert John Deere sy eerste trekker, die Waterloo Boy-trekker, aan boere bekend gestel het.
John Deere se Waterloo Boy-trekker is toentertyd by die nasionale trekkerdemonstrasie in Salina in die Amerikaanse deelstaat Kansas bekend gestel, nes John Deere vandag steeds doen met sy baanbrekermasjinerie op die Nampo-Oesdag.
Die bekende groen-engeel masjinerie van die John Deere-handelsmerk is juis vanjaar weer op dié skou te sien in een van Nampo-park se grootste vrystaande uitstallings.
Die storie van die John Deere-maatskappy, seker die bekendste vervaardiger van landboumasjinerie, kan teruggevoer word na die suksesvolle skaarploeg wat die ystersmid John Deere in 1837 gemaak het. Deere se onderneming, Deere & Company, het gou gegroei en het 80 jaar later die trekkermark betree. Dit was egter die maatskappy se eerste trekker wat die grootste sprong vir die Deerenaam én die landbou gebring het.
BEGIN VAN ’N ERA
Een van Deere se fabrieksuperintendente, ene mnr. George Mixter, het in 1915 in ’n brief aan die maatskappy se voorsitter, mnr. William Butterworth, geskryf dat hul mededingers se aanbod van trekkers net goed was tot op ’n punt. “[Die trekkers] is nie met die nodige sorg en insig ontwerp of gebou om seker te maak dat dit in die hande van ’n boer sal hou nie. Sou Deere ’n klein trekker kan bou wat regtig vir vyf jaar of langer op ’n plaas kan werk, glo ek dat die trekker ’n permanente vereiste van die Amerikaanse boer sal word.”
Dié stelling is natuurlik na selfs ’n eeu steeds die waarheid.
Van 1912 tot 1917 het die Deere-maatskappy se verteenwoordigers die Amerikaanse platteland deurkruis om presies uit te vind wat dit is wat boere nodig het en verkies.
Verskeie probeerslae om ’n ekonomiese model te skep wat harder kan werk as ’n perd, betroubaarder is as ’n perd en ook goedkoper is om aan te skaf en onderhou, is aangepak.
Eindelik het sukses met trekkers ’n werklikheid geword met die koop van die Waterloo Gasoline Engine Company in 1918. Die rede vir die aankoop was die gewilde Waterloo Boy-trekker met sy horisontaal werkende tweesilinderenjin wat op paraffien geloop het. Met die Waterloo Boy-trekker kon twee belangrike vrae beantwoord word: Wat verwag boere van ’n trekker wat die trekperd kan vervang? Kan Deere ’n trekker vervaardig wat sterk en duursaam genoeg is vir daaglikse plaaswerk én wat alle ander vervaardigers se trekkers sal oortref?
SKOUPERD
Met soveel vertroue in die nuwe trekker het die maatskappy bykans ’n derde van sy advertensiebegroting nét op die Waterloo Boy bestee om die bekendstelling te bemark. Die maatskappy het bankvas agter dié nuwe produk gestaan en het die Waterloo Boy Model N met groot fanfare bekend gestel. Só is die Waterloo Boy in 1918 op die land se grootste demonstrasiedag van daardie tyd in Kansas amptelik onder die Deere-vaandel aan boere gebring.
Die Model N het sy waarde gewys en het met praktiese demonstrasies allerlei werktuie deur hul passies gesit.
’n Ploeg, skotteleg, graanplanters en waens (vol mense) is met gemak rondgesleep. Die demonstrasies en indrukwekkende dekor was ’n groot sukses en die skou het selfs ’n eerbewys aan die maatskappy gegee vir die beste tentoonstelling.
NUWE STAATMAKER
John Deere het die groen-en-geel Waterloo Boy tot 1923 verkoop voordat dit met die splinternuwe John Deere D-model vervang is. Dit het steeds die basiese Waterloo Boy-ontwerp gebruik.
Vir die volgende 30 jaar was dié stewige D-model die spreekwoordelike baas van die plaas. Dit was die langste tydperk vir een trekkerreeks op die mark en ’n spoggerige 160 000 eenhede is verkoop. www.deere. 011 437 2600. Bylae tot Landbouweekblad