Betroubare en bekostigbare masjiene vir die plaas sal vanjaar by Babcock Internasionaal se SDLG-uitstalling by standplaas F30 op Nampo te sien wees.
Plaaswerk verg doeltreffendheid om winsgewend te wees. Boere vereis daarom masjiene met gevorderde tegnologie wat krag en betroubaarheid bied. Daarvoor het Babcock, verspreiders van SDLG en Volvo in Suid-Afrika, net die antwoord.
“Nampo het die afgelope paar jaar uitstekende geleenthede aan Babcock gebied. Ons sien uit daarna om weer bestaande en toekomstige kliënte op dié landbouskou te ontmoet,” sê mnr. Grant Sheppard. Hy is die streekbestuurder vir Babcock Internasionaal se uitvoer van toerusting na Afrika, en sien toe dat Zambië, Namibië, Botswana, Zimbabwe, Mosambiek, Malawi en Suid-Afrika die beste masjiene uit die Babcock-stal ontvang.
“Babcock is opgewonde om sy masjiene op die skou bekend te stel. Die uitstalling sal die SDLG-laaigraaf, SDLG TLB en SDLG-padskraper, asook die Volvolaaigraafreeks en Volvo-graafmasjiene insluit.”
Grant het ook ’n bykomende portefeulje as ambassadeur van die Chinese handelsmerk SDLG. Dié bekostigbare swaardiensmasjiene is ideaal vir die landbou en boubedryf en sal op die NampoOesdag te sien wees.
RAAKVATTERS
“Die SDLG 958F-laaigraaf is ideaal om onder meer sand, grond of mis te verskuif. Vir veeboere is die 958F ook nuttig om voer, graan of kuilvoer in groot maat, maar met presisie te hanteer,” sê Grant.
Die nuwe SDLG B877F TLB met sy agterste graaflaaier vervang die vorige model.
“Hierdie nuwe weergawe het ’n herontwerpte kajuit en verbeterde hidroulika. Operateursgemak geniet voorkeur. Beter lugverkoeling is daarom in die B877F aangebring en die kontroles is beter geposisioneer.”
Die SDLG B877F TLB grawe met gemak slote en gate. Maklike aan- en afhaakopsies beteken dié werktuig is veelsydig. Só kan die voorste graafbak vinnig afhaak om plek te maak vir ’n stel vurke.
PADSKRAPERS
Min dinge kan jou moed breek soos ’n slegte plaaspad wat jou reistyd verleng en skade aan voertuie kan aanrig. Gelukkig is die nuwe SDLG 9220-padskraper – ’n opgradeerde weergawe van die SDLG 9190 met ’n lem van 14 voet – die regte medisyne om slegte paaie reg te ruk.
Met sy groter lem van 14 voet, kragtiger enjin met meer trekkrag (164 kW Dalian Deutz-enjin) en drie kragkurweverstellings skraap die 9220 ’n pad maklik glad én verbruik hy brandstof meer doeltreffend.
“’n Groot voordeel van hierdie model is dat hy ’n passasiersitplek met veiligheidsgordel het. Twee operateurs kan dus saam ry en mekaar aflos of ’n vlagman kan saam ry na waar die werk gedoen word.”
Die 9220-padskraper is toegerus met drie skeurtande en ’n drukblok wat lelike stukke in die pad kan omploeg voordat die skraper dit weer plat skraap.
ONDERSTEUNING
Grant sê die gewildheid van die SDLG-handelsmerk het die afgelope dekade skerp toegeneem sedert sy toetrede tot die internasionale mark.
“Volvo is nou die hoofaandeelhouer in SDLG en die maatskappy se invloed op navorsing en ontwikkeling in bekostigbare en betroubare tegnologie is duidelik te sien. SDLG is sedert 2011 in Suid-Afrika en vertroue in die naam spruit uit dié masjiene se gehalte en betroubaarheid.”
Babcock bied uitstekende naverkoopdiens en bekostigbare onderdele vir onderhoudswerk vanuit verskeie takke in die land.
“Die SDLG-handelsmerk is betroubaarheid in aksie. Ons maak seker ons dienslewering is net so betroubaar,” sê Grant.
Grant sê dié masjiene is ook gewild in die verhuringsmark en onder kontrakteurs.
Die verdere rugsteun van ’n waarborg bevestig dat Babcock glo in die produk se duursaamheid en bevestig dat die masjiene van topgehalte is. www. babcock.co.za
grant.sheppard@ babcock.co.za; 011 230 7300. Bylae tot Landbouweekblad