Toyota het ’n nuwe model, die VX-L, by sy Land Cruiser Prado-reeks gevoeg. Dié voertuig spog met talle verbeteringe.
Die VX-L het al die eienskappe van die VX, maar dit het ook ’n elektries beheerde kantel-en-skuif-dakluik en ’n omvattende aktiewe veiligheidshulppakket.
Die nuwe Prado pronk met nuwe vooraansigelemente, soos die enjinkap, sierrooster, kopligte, buffer en wielnisse, wat op die strukturele elemente van die model se ontwerperfenis dui. In pas met die Land Cruiser Prado se erfenis pronk die sierrooster met breë vertikale stawe met verchroomde gleufopenings vir verkoeling.
NUWIGHEDE
Die grondvryhoogte is 215 mm en die invalshoek 31 grade. Die vertrekhoek is 25 grade en die oorbruggingshoek is 22 grade. Die voertuig se kantaansig word verder deur stylvolle nuwe wiele verbeter – 17”-allooisierwiele vir die TX en geverfde hoëglans-18”-vellings vir die VX- en VX-L-weergawes.
Nuwighede aan die agterkant sluit in ’n herontwerpte stertlighulsel (met twee gestapelde C-vorms) en ligdiode-remligte, ’n kleiner nommerplaathulsel en ’n herontwerpte agterbuffer.
BINNERUIMTE
Die bokant van die nuwe instrumenthuisie in die middel is laer (25 mm) vir ’n slanker voorkoms en beter uitsig na vorentoe vir veldrywerk. Die voorpaneel het ’n nuwe 8”-volkleur-multimediaskerm, ’n beheerpaneel vir lugversorging en doelontwerpte instrumente vir die voertuig se dryfstelsel.
Die nuwe model het ’n 4.2”-TFT-volkleurskerm (VX en VX-L) met omvattende voertuig- en vermaakstelselinligting wat deur stuurwielskakelaars beheer word. Die gekombineerde leer-en-hout-afwerking van die stuurwiel is ook nuut.
NUWE TOERUSTING
Die TX-modelle erf ’n groot gunsteling, naamlik die middelkonsole-koelboks. Al die modelle is nou met sitplekventilasie vir die bestuurder en voorste passasier toegerus – benewens die sitplekverhitting vir die sitplekke in die voorste en tweede ry.
Die vlagskip-VX en VX-L het ook ingeboude satellietnavigasie en ’n gevorderde veelterrein-kameramonitorstelsel wat reg rondom die voertuig kan sien en ook panoramiese en oorhoofse beelde vertoon. Die nuwelinge pronk ook met 14 luidsprekers wat aan die raakskerm-klankstelsel gekoppel is.
Die standaardgeriefstoerusting sluit in outomatiese dubbelsone-klimaatbeheer, ’n klankstelsel met ses luidsprekers, elektries verstelbare bestuurdersitplek, inklimbeligting, spoedbeheer, parkeerhulp, sleutellose toegang, drie kragsokke, Bluetooth-verbinding, USB-sokke, ’n derde ry sitplekke en ’n trurat-kamera.
Die hoërgraderingmodelle kry geheuewerking vir die verstelling van die bestuurdersitplek, 14 luidsprekers vir die klankstelsel met ’n diepbas-luidspreker, ’n vertoonskerm, elektries beheerde kantel- en teleskopiese verstelling vir die stuurkolom, reënsensorruitveërs en sitplekke in ’n derde ry wat elektries weggevou kan word.
VEILIGHEID
Die VX-L-weergawe van die nuwe Prado is toegerus met Toyota se aktiewe veiligheidstegnologie om botsings te help voorkom of die uitwerking van ’n botsing te verminder.
Die pakket behels ’n voorkomende waarskuwingstelsel (PCS), veranderlike spoedbeheer (ACC), baanwaarskuwing (LDA) en outomatiese hoëstraalkopligte (AHB).
Ander bestuurderhulp is in die vorm van ’n blindekolmonitor met agterkant-dwarsverkeerwaarskuwing (VX en VX-L) en ’n opgeknapte banddrukwaarskuwingstelsel met ’n digitale lesing in die inligtingvertoonskerm.
WAARBORG EN DIENS
Alle Land Cruiser Prado-modelle kry ’n diensplan vir vyf jaar of 90 000 km en ’n waarborg van drie jaar of 100 000 km. ccc@tsb.toyota.co.za, 0800 139 111. Bylae tot Landbouweekblad