Senseed wil seker maak elke graanprodusent het toegang tot gehaltesaad van die kultivars wat by VKB en Sensako beskikbaar is.
Senseed, die gesamentlike bemarkingsafdeling van VKB en Sensako, is verlede jaar bekend gestel. Die oogmerk daarmee is om Sensako se bestaande reeks produkte, asook verskeie saaden weidingsreekse van ander verskaffers aan VKB, aan produsente te verskaf.
VKB is ’n gevestigde maatskappy wat in groot dele van die produksiegebiede finansiering en produksie-insette verskaf. Sensako is ook reeds lank in die saadbedryf en trots daarop om eg Suid-Afrikaans te wees.
Sensako is toegespits op die ontwikkeling van produkte vir die Suid-Afrikaanse mark met die doel om plaaslike boere winsgewend in bedryf te hou. Die bekendstelling van nuwe kultivars vereis intensiewe opbrengstoetse en uitstekende graangehalte – iets waarvoor veral Sensako se koringreeks bekend is.
’n Hoë standaard word by die bekendstelling van nuwe kultivars gehandhaaf. Teeldoelwitte en agronomiese vereistes moet nagekom word om die ekonomiese mededingende vermoë van gewasse te versterk.
Om kultivars te kies, is ’n belangrike produksiebesluit en die keuse moet by elke produksiestelsel se vereistes inpas. Opbrengs en graangehalte kraai koning, terwyl betroubare en objektiewe proefresultate oor die stabiliteit van opbrengsreaksie oor jare belangrik is om produksierisiko’s te bestuur. ’n Reeks winterkoringkultivars van Sensako met goeie aanpasbaarheid oor die hele planttydspektrum van vroeg tot laat, goeie opbrengspotensiaal en siekte-eienskappe is beskikbaar. Kultivars vir besproeiing met ’n goeie opbrengspotensiaal en wat by elke planttyd kan inpas, is ook beskikbaar vir aanplantings in die onderskeie produksiegebiede. Die onderskeie kultivars is:
SST 3149. SST 387. SST 347. SST 317. SST 316. SST 356.
SST 843. SST 884. SST 895. SST 875. SST 835. SST 806. SST 866. Die belowende kultivar SST 8135 is ook van vanjaar af kommersieel beskikbaar.
Sensako se bestaande reeks hawer- (SSH) en rogkultivars (SSR) het hulself reeds bewys en die produkte is beskikbaar vir winterweiding, sny en baal, en graanproduksie.
Nuwe genetiese materiaal word deurgaans getoets vir verhoogde graan- en weidingsgebruike, en verbeterde kultivars word deurgaans ingefaseer.
’n Reeks somer- en weidingsgewasse en grasse van verskeie verskaffers is beskikbaar, asook die nuwe lusernkultivar SSL 148 wat Senseed bemark. Sensako het nuwe sojaboonkultivars bekend gestel – SSS 5449, SSS 5052 en SSS 6560. Dit word reeds kommersieel aangeplant met goeie opbrengsprestasie in al die produksiegebiede. Dié kultivars is onbepaalde groeiers, met glifosaat-weerstand en goeie agronomiese eienskappe.
Die nuwe Clearfield-baster SY 3970CL word met behulp van Syngenta bemark. Hierdie kultivar bied mededingende opbrengste en die voordeel van Clearfield-tegnologie in onkruidbestryding. Dit is ’n wennerkombinasie in droëlandverbouing. Die geelmieliekultivar SNK 768 is uit Sensako se konvensionele mielieteelprogram bekend gestel. Hierdie mediumgroeitydkultivar vergelyk goed met die beste konvensionele basters in die mark wat opbrengsprestasie betref. Agronomiese kenmerke sluit in meerkoppigheid, oorwegend enkelstammig en goeie siekteverdraagsaamheid.
’n Witmieliekultivar, SNK 61, is ook beskikbaar. Hierdie oopbestuifde kultivar kan gebruik word vir graanproduksie, weimielies en kuilvoer. Sensako se kultivargids vir die somerreëngebied verskaf alle inligting oor die produkreeks, kultivareienskappe, opbrengsresultate, saadbeskikbaarheid en ook die lys bemarkers om vir die komende produksietyd te kontak. www.sensako.co.za; 058 303 4690.