DIÉ WEEK IN DIE LANDBOU
SÓ BOER JY MET ALPAKKAS
Dr. Jane Vaughan, ’n bekende Australiese alpakkakenner, is een van die sprekers op die alpakka-telersgenootskap se tweede gesondheidsforum, wat eersdaags in Franschhoek aangebied word. Vaughan sal onder meer inligtingsessies oor alpakkas se gesondheid, herkouervoeding en voortplanting (ook embrio-inplanting) aanbied, en ook veeartsenykunde-studente toespreek oor dié diere. Me. Alison Notley, voorsitter van die genootskap, sê min inligting oor alpakka-gesondheid is tans in Suid-Afrika beskikbaar. Dié diere se gesondheidsbehandeling verskil van ander kleinvee s’n. Die konferensie vind van 31 Julie tot 2 Augustus plaas. Vir meer inligting, stuur ’n e-pos aan alpacas@helderstroom. co.za of skakel 082 662 9670. FOTO: HELDERSTROOM ALPAKKAS
SOJAMEESTER
Die kunsmismaatskappy Elim bring later vandeesmaand die rekord-graanboer mnr. Randy Dowdy van die Amerikaanse deelstaat Georgia na Suid-Afrika vir ’n reeks boeredae, waar hy meer oor sy boerderygeheime gaan vertel. Dowdy boer nog net 12 jaar lank, maar het in 2014 die hoogste opbrengs gelewer in Amerika se nasionale mieliekwekersvereniging se kompetisie, en in September 2016 het hy 171,8 skepels soja per akker (gelykstaande aan 10,784 t/ha) geoes, vir ’n nuwe wêreldrekord. Hou komende uitgawes van Landbouweekblad dop vir meer inligting.
NULKOERS
Die genoteerde hoenderprodusent Astral mag nie sy voorsitter betaal nie. Dít is nadat die meerderheid van die maatskappy se aandeelhouers op die onlangse algemene jaarvergadering teen ’n spesiale resolusie gestem het wat dr. Theuns Eloff, die nie-uitvoerendedirekteur,sesalarisopR1,1 miljoen (BTW uitgesluit) vir die huidige boekjaar sou stel. Moneyweb berig dit is waarskynlik die eerste keer in die geskiedenis van die JSE dat aandeelhouers nie die betaling van ’n genoteerde maatskappy se voorsitter steun nie. Eloff verdien meer as mnr. Z.L. Combi, Pioneer Foods se uitvoerende direkteur, wat R869 000 verdien. Dit is ten spyte daarvan dat Pioneer gewaardeer word op R28 miljard teenoor Astral se R13 miljard. Astral sê hy “sal advies inwin en beskikbare opsies oorweeg”.
SPOEL AF!
Aarbeie en spinasie bevat verreweg die meeste plaagdoderresidu van alle vars produkte wat in die kleinhandel beskikbaar is, aldus vanjaar se verbruikersgids van die verbruikersdrukgroep Environmental Working Group. Gegrond op toetse wat deur die Amerikaanse departement van landbou gedoen is, is daar per gewig nagenoeg dubbel soveel plaagdoderresidu op spinasie as op enige ander vrugte of groente. Een aarbeimonster het positief getoets vir 20 verskillende soorte plaagdoders. Die produkte met die meeste residu was nektariens, appels, druiwe, perskes, kersies, pere, tamaties, seldery, aartappels en soetrissies. Die produkte met die minste residu was avokado’s, mielies, pynappels, kool, uie, bevrore ertjies, papajas, aspersies, mango’s, eiervrug, spanspek, kiwivrugte, blomkool en broccoli. Die verslag se bevindings was feitlik dieselfde as verlede jaar se verslag.
OMGEWINGSTRYDERS
Twee Suid-Afrikaanse vroue het onlangs die invloedryke Goldmanomgewingsprys vir 2018 gewen vir hul jare lange stryd om te keer dat ’n aantal nuwe kernkragsentrales in Suid-Afrika gebou word. Mee. Makoma Lekalala, direkteur van Earthlife Africa, en Liziwe McDaid van die omgewingsinstituut van Suid-Afrikaanse geloofsgemeenskappe (Safcei) was ook nou betrokke by verlede jaar se toonaangewende hofsaak oor die
BETER JAAR
Die genoteerde kosprodusent Pioneer Foods verwag ’n groot verbetering op sy finansiële resultate vir die ses maande tot einde Maart vanjaar teenoor die ooreenstemmende tyd verlede jaar. Hy sê in ’n verklaring op die JSE-nuusdiens hy verwag sy bedryfswins voor kapitaaluitgawes sal van 33% tot 44% hoër wees. Dit is R922 miljoen tot R991 miljoen hoër, teenoor verlede jaar se R688 miljoen. Die wesensverdienste per aandeel sal na verwagting van 25% tot 35% hoër wees — van 305,5 sent tot 329,9 sent per aandeel. Algehele verkoopvolumes was 4,3% hoër, maar die groep se omset het weens verkoopsprysdeflasie met 2,8% gedaal van R10,2 miljard tot R9,9 miljard. Die resultate word na verwagting teen 21 Mei bekend gemaak.
HERNUBARE KAROO
Nagenoeg 80% van die 27 vennootskappe vir nuwe hernubare energieprojekte wat onlangs deur die Regering onderteken is, sal in die Karoo geleë wees. Talle van dié projekte bevoordeel egter nie die inwoners van die Karoo regstreeks nie omdat die projekte deur buitestanders besit en bedryf word. Volgens dr. Stefan Cramer, wetenskaplike adviseur vir die omgewingsinstituut van Suid-Afrikaanse geloofsgemeenskappe (Safcei), wat ’n sleutelrol gespeel het in die siviele aksie teen uraan-ontginning in die Karoo, lê die uitdaging daarin om Karoodorpe “100% hernubaar” te maak. Terselfdertyd moet verseker word dat armes eerste baat vind by die projekte.