Sien is glo oor dié begrotings
TOE dok Frans Cronjé van die Instituut vir Rasseverhoudinge twee weke gelede noem dat die Regering se begroting vir grondhervorming omtrent dieselfde is as sy uitgawes aan die beskerming van politici, het Manie gedink dit is bietjie dik vir ’n daalder. Dít kan tot sekerlik nie waar wees nie!
Kort daarna het Gwen Ngwenya, beleidshoof van die DA, dit op ’n debat oor onteiening sonder vergoeding herhaal om te toon vergoeding vir grond het nog nooit voorrang in ’n regeringsbegroting geniet nie. Sy het gesê die Regering bestee R2,6 miljard aan BBP-beskermingsdienste en het omtrent dieselfde vir grondhervorming begroot.
Africa Check, ’n organisasie wat hom beywer om feite na te gaan, het ’n bietjie dieper ondersoek gaan instel en met die volgende vorendag gekom:
Volgens die 2018-’19-begroting sal die uitgawes aan BBP-beskerming en -sekuriteitsdienste R2,9 miljard behels uit ’n totale polisiebegroting van R91,8 miljard.
In dieselfde boekjaar is die Departement van Landelike Ontwikkeling en Grondhervorming se begroting R10,4 miljard. Daarvan gaan onder meer R1,8 miljard aan administrasie, R690 miljoen aan bestuursdienste, R1,8 miljard aan landelike ontwikkeling, R3,4 miljard aan restitusie en inderdaad net R2,7 miljard aan grondhervorming.
Tegnies is Frans en Gwen dus heeltemal reg. Al wat ’n mens ter versagting kan sê, is dat restitusie darem ook deel van die Regering se groter grondhervormingsplan vorm.
VESTIG NUWE BOERE SÓ
In dieselfde meningstuk daaroor in die Sondagkoerant Rapport, gee Frans ’n eenvoudige resep waar- volgens die Regering werklik ’n swart boer kon bemagtig het. Hy reken goeie weidingsgrond kan teen R10 000/ha bekom word. ’n Billike veeplaas van 1 000 ha kan dus teen R10 miljoen gekoop word.
Voeg daarby R10 miljoen vir 200 dragtige koeie, bedryfskapitaal, werktuie en selfs ’n Land Cruiser-bakkie. Vir R20 miljoen kan ’n skuldlose kommersiële boer gevestig word wat ’n positiewe kontantvloei van R1 miljoen kan voortbring.
Maar die Regering wil eerder op die grond van suksesvolle boere beslag lê, dit aan opkomende boere verhuur wat dan geen aanvullende sekuriteit of kapitaal het nie en wat volkome afhanklik van die staat bly.
Om te sê daar is nie geld nie, dra ook nie water nie. Frans sê die SAL het verlede jaar R10 miljard se reddingshulp ontvang en het nou weer vir R5 miljard gevra. Daarmee sou 750 nuwe swart kommersiële boere gevestig kon word, gegrond op sy resep.
VERKIESINGSFOEFIES
Maite Nkoana-Mashabane, Minister van Landelike Ontwikkeling en Grondhervorming, het verlede week met groot fanfare aangekondig dat sy ’n titelakte vir ’n grondeis wat 20 jaar gelede ingedien is, gaan oorhandig. Die titelakte word aan die Roka Lebea-stam in die distrik Sekhukhune oorhandig vir grond waarop hulle sedert omstreeks 1800 woon. Hulle is nooit van die grond verwyder nie, maar het nooit eienaarskap gehad nie.
Hoewel Manie verheug is dat die mense nou ware eienaars van die grond word, wonder hy hoekom dit 20 jaar geduur het om die eis af te handel en hoekom die minister dit na ’n prestasie laat klink.
Dit is soos Mildred Oliphant, Minister van Arbeid,
wat verlede week in haar begrotingsrede dit ook laat klink het of die Regering se taak volbring is toe sy gesê het die instelling van ’n minimum loon is die enigste “beleidsvereiste” in die Vryheidsmanifes wat nog uitstaande is. “Wanneer dit afgehandel is, kan ons terugstaan en met reg afkondig dat die opdrag voltooi is.”
Kan ’n mens sulke belaglikhede kwytraak as daar ongeveer 9,2 miljoen werklose mense in Suid-Afrika is en die instelling van die minimum loon ’n verdere miljoen werkverliese kan meebring?
Oliphant sê in dieselfde asem die propaganda teen die instelling van die minimum loon is niks anders nie as ’n verkiesingsfoefie om punte aan te teken voor volgende jaar se nasionale verkiesing. As Manie na hierdie twee ministers luister, is daar geen twyfel oor wie werklik met verkiesingsfoefies besig is nie.
PETA(LJE) OOR SYBOKHAAR
Dit is nog te vroeg om te sê wat die langtermyninvloed van ’n onlangse video deur die dieresorgorganisasie Mense vir die Etiese Behandeling van Diere (Peta) op die bokhaarbedryf gaan hê, maar Manie sien dit het internasionaal opslae gemaak.
Sommige bekommerdes meen die sybokhaarbedryf is baie klein vergeleke met die wolbedryf en dus meer kwesbaar vir aanslae deur diereregtegroepe.
Dit is uiters moeilik om die bokhaarspoor internasionaal deur die verskillende bokhaarprodukte en -mengsels in die waardeketting te volg en te polisieer.
Ander meen dat dit maar net ’n tydelike storm is wat gou sal oorwaai. Peta het mos al baie bedrywe getakel – vanaf pels tot by wol – en soek al lankal ’n nuwe slagoffer om die organisasie weer woema te gee en skenkings aan te wakker. ’n Klompie niksvermoedende boere het hulle ’n gulde geleentheid daarvoor gebied.
Dit help niks om teen Peta te velde te trek óf om te vra wat van die miljoen Angoras gaan word as daar nie ’n mark vir hul vlies is nie. Ook nie om te probeer verduidelik dat dit wreder is om die dier nié te skeer nie. Om met Peta te argumenteer, is om kole op die vuur te gooi. Die organisasie erken openlik dat hy skoktaktiek gebruik om sy veldtogte in die nuus te hou.
Dit is die eindverbruikers van bokhaar wat daarvan oortuig sal moet word dat die vesel wel volgens Sybokhaar SA se produksiekode geproduseer word. Ongelukkig, in hierdie era waarin diereregte ’n al groter rol speel in bemarking, moet daar met groot omsigtigheid omgegaan word.
In daardie lig beskou, moet boere die Peta-video mooi bestudeer. Dit wat daar weerspieël word, is bokhaarboerdery soos gesien deur die oë van mense (verbruikers) wat nie op ’n plaas grootgeword het nie. Al eet hulle vleis, hou hulle nie van bloed of diere wat lyk of hulle ly nie.
Hopelik sal Peta nie gou weer ’n kans kry om onder valse voorwendsels op Suid-Afrikaanse plase rond te snuffel nie. Terselfdertyd moet boere altyd hulle eie huis ook in orde hou.
TE VEEL VAN ’N KEUSE
Die rede waarom ek nie by ryk mense wil kuier nie:
Vraag: “Wat wil jy drink?” Antwoord: “Tee, asseblief.”
V: “Ceylon-tee, kruietee, rooibostee, heuningbostee, ystee of groen tee?” A: “Ceylon-tee, asseblief.”
V: “Hoe verkies jy dit? Swart of wit?” A: “Wit, asseblief.”
V: “Melk, kondensmelk of poeiermelk?” A: “Melk, asseblief.”
V: “Bokmelk, kameelmelk of beesmelk?” A: “Beesmelk, asseblief.”
V: “Melk van ’n Holstein, Jersey of Ayrshire?” A: “Hmm. Ek sal dit eerder swart neem, asseblief.”
V: “Verkies jy dit met versoeter, suiker of heuning?” A: “Met suiker, asseblief.”
V: “Beetsuiker of rietsuiker?”A: “Rietsuiker, asseblief.”
V: “Wit, bruin of geel suiker?” A: “Vergeet maar net van die tee. Ek sal eerder ’n glas water vat dankie.”
V: “Mineraal of kraanwater?” A: “Mineraalwater asseblief.”
V: “Gegeur of ongegeur?” A: “Ag, los maar. Ek vrek liewer van die dors.”