Boere van Noordwes skep moed ná drama oor Mahumapelo
DIE verhouding tussen Agri Noordwes en die Noordwes-regering het onder die administrasie van mnr. Supra Mahumapelo, premier van Noordwes, totaal verbrokkel.
Volgens mnr. Boeta du Toit, voorsitter van Agri Noordwes, was daar geen interaksie meer tussen die boerevereniging en die provinsiale departemente van grondsake en van landbou nie.
Hoewel hy meen dit gaan lank duur om weer vertroue op te bou, sê Du Toit wisselwerking tussen die georganiseerde landbou en die provinsiale regering kan net verbeter.
Mahumapelo was met druktyd op langverlof ná’ n in termini ste departemente riële taakspan onder leiding van me. Nkosazana Dlamini-Zuma, Minister in die Presidensie belas met Beplanning, Monitering en Evaluering, aan die Kabinet terugvoering gegee het oor ’n ondersoek na beweerde korrupsie en wanbestuur in die provinsie.
Pres. Cyril Ramaphosa het die Noordwes-regering onder administrasie van die nasionale Regering geplaas kragtens seksie 100(1) van die Grondwet, en klagtes teen Mahumapelo word ondersoek.
“Ons weet nog nie presies wat dit gaan behels nie en hoe dit amptenare in die verskillende staats- gaan raak nie,” sê Du Toit. Hy is egter vol hoop dat die verhouding tussen boere en die provinsiale regering weer op ’n punt sal kom waar hulle saamwerk om ’n beter landbou-omgewing vir almal daar te stel.
“Ons het in die verlede goed saamgewerk en daar was projekte vir die ontwikkeling van die landbou op goeie ekonomiese beginsels op die tafel. Onder Mahumapelo het dit egter op niks uitgeloop nie. Dalk kan ons dit weer op dreef kry.”
Du Toit waarsku egter dat sommige amptenare in die verskillende departemente en munisipaliteite lojale kaders van Mahumapelo is en dat selfs die nasionale Regering gaan sukkel om korrupsie daar hok te slaan.
“Die grootste verskil wat die nasionale Regering nou kan maak, is om korrupsie en wanadministrasie in ons munisipaliteite hok te slaan en hulle uit bankrotskap te bestuur,” sê Du Toit. “Dit sal die provinsiale ekonomie ruimte gee om te herstel en ons almal sal daarby baat vind.”
‘Ons het in die verlede goed saamgewerk.’