Nampo is die ‘plaashek na Afrika’
AL hoe meer oorsese ondernemings gebruik die NampoOesdag as ’n platform om ooreenkomste met plaaslike belanghebbendes te ondersoek ten einde hul teenwoordigheid in Afrika uit te brei en uitvoergeleenthede te ontgin.
“Jy kan Nampo as’t ware die plaashek na Afrika noem,” sê mnr. Cobus van Coller, uittredende voorsitter van die Nampo-Oesdagkomitee.
Volgens hom is die Nampohandelsmerk ook in ander lande bekend. Trouens, verlede jaar het ’n internasionale maatskappy wat bedryfseminare en handelskoue reël, die Oesdag besoek en aan Graan SA aangedui dat hy graag die Oesdag wil koop.
“Van die Italianers het al vertel dat hulle baie bewus is van die groot geleentheid wat jaarliks in Afrika plaasvind,” sê Van Coller.
Die Oesdag se besoekerstal groei ook stewig, terwyl tot 30 nuwe uitstallers per jaar die afgelope paar jaar bygekom het. “Ons sien dat baie verbruikers die Oesdag kom bywoon om hulself beter in te lig oor die bedryf en hoe hul voedsel geproduseer word. Die Oesdag word ook al hoe gewilder onder lede van die hoofstroomen internasionale media.”
KOMMUNISIEKANAAL
Van Coller het agt jaar in die Oesdagkomitee gedien. Hy sê in dié tydperk het hy gesien hoe waardevol die Oesdag geword het as ’n kommunikasiekanaal binne die landboubedryf. Die kommunikasie waarna hy verwys, is nie net ten opsigte van mediadekking, skakeling met internasionale vennote of ondernemings wat met bestaande of potensiële kliënte in verbinding kan tree nie.
“Dit het ook ’n plek geword waar boere en belanghebbendes begin saamkom het om debatte te voer oor belangrike kwessies of om hul sorge en vreugde met mekaar te bespreek.”
Hy sê die groei wat hy in Nampo gesien het, oortuig hom ook van die waarde wat die landboubedryf het. “Die landbou bly een van jou beste beleggings. In lande waar daar nie ’n werkende landboubedryf is nie, breek daar oorloë uit.”
DIEBESTEBOERE
Oor sy bedanking as raadslid by Graan SA en as voorsitter van die komitee sê Van Coller dié besluit was tweeledig. “Ek loop te veel van my kinders se lewe mis en hulle is vir my baie kosbaar. Ek wil niks misloop nie.”
Tweedens wil hy hom op sy boerdery toespits, veral omdat hy een van die boere is wat voorloop met bewaringsboerdery. “Ek wil my volle aandag daaraan gee en foute so ver moontlik beperk, want boerdery is té riskant om groot foute te maak. Verder wil ek ook ’n goeie grondslag lê vir my kinders en húl kinders om in die toekoms te kan aanhou boer.”
Van Coller sê hy is trots op Suid-Afrika se boere, want hulle het keer op keer bewys hoekom hulle die beste ter wêreld is. “Suid-Afrika het regtig die beste boere wat in die moeilikste omstandighede voedsel bekostigbaar kan voorsien.” —