ROYAL-SKOU GAAN VAN KRAG TOT KRAG
DIE Royal-skou in Pietermaritzburg doen vanjaar weer sy naam gestand as Suid-Afrika se grootste gemengde landbouskou. Benewens ’n rekordgetal van nagenoeg 1 000 inskrywings in die kategorie vir konyne, het die aantal inskrywings in elke kategorie vir lewende hawe vanjaar toegeneem.
Mnr. Terry Strachan, die skou se uitvoerende hoof, sê die Royal-skou bied nie net die geleentheid vir boere om hul beste diere te vertoon nie, maar ook om hul diere met die beste van ander boere te vergelyk om sodoende uiteindelik hul kuddes te verbeter.
Die skou vind vanjaar van 25 Mei tot 3 Junie vir die 168 ste keer by die Royal landbougemeenskap se skouterrein in Pietermaritzburg in KwaZulu-Natal plaas.
“Die Royal-skou kan amper as ’n nasionale skou geag word, aangesien die inskrywings van buite KwaZulu-Natal tans die provinsie se eie inskrywings oorskry,” sê Strachan.
Hy sê die organiseerders is ook aangenaam verras met ’n toename in inskrywings in al die kategorieë vir lewende hawe, soos voëls, skape en beeste. Die skou spog ook met die grootste uitstalling van heuning in Suid-Afrika.
KARKASKOMPETISIE
Volgens Strachan is een van die grootste trekpleisters vir die landbougemeenskap Landbouweekblad se karkaskompetisie en veiling, waar tot nou toe drie nasionale en een internasionale rekord opgestel is.
Die wêreld- en nasionale rekord vir skaapvleis (teen R3 000/kg) is in 2007 opgestel, die nasionale rekord vir beesvleis is in 2015 staangemaak teen R150/kg, en die varkkasrekord is in 2016 opgestel teen R95/kg. Vanjaar se karkaskompetisie sal om Dinsdag 29 Mei in die skaapskousaal plaasvind.
Strachan sê hy glo die skou se behoud die afgelope 30 jaar was om seker te maak die hoofklem val op die landboubedryf.
Ander noemenswaardige items op die program sluit in die KwaZulu-Natalse ronde van Toyota se kompetisie vir jong afslaers, ’n verkoping van inheemse veldbokke, ’n uitstalling van wol en natuurlike vesels, en die skou van allerlei rasse in die verskillende kategorieë vir lewende hawe.