ASTRAL HERBELÊ WINS IN SY BEDRYWIGHEDE
DIE pluimvee produsent Astral beplan R1,3 miljard se kapitaalprojekte vir die volgende twee tot drie jaar.
Dié besteding behels onder meer ’n nuwe voeraanleg in Afrika, outomatisering vir die kitskosbedryf, asook algemene uitbreiding om meer hoenders te kan verwerk.
Die maatskappy het pas uitsonderlike halfjaar resultate bekendgemaak, waarvolgens sy bedryfswins in die ses maande tot 31 Maart met 393% gestyg het.
Die meeste van sy wins is in kontant omskep, wat Astral nou ’n gulde geleentheid bied om te herbelê, het mnr. Chris Schutte, uitvoerende hoof, by die aankondiging van die resultate gesê.
“Ons sit nie op ons kontant nie, ons betaal belasting en dividende, en ons brei uit. Ons bestee byna al ons wins terug in die Suid-Afrikaanse fiskus.
“As die Regering ons toelaat om te groei, sal ons groei, en geld belê,” het hy gesê met verwysing na gesprekke tussen die bedryf en die Regering om die bedryf teen goedkoop invoer te beskerm.
UITBREIDING IN FASES
Schutte het gesê die uitbreiding van Astral se verwerkingsvermoë sal in fases geskied sodat hy nie skielik ’n klomp bykomende hoender in die mark stoot nie.
Sy Festive-aanleg in Gauteng gaan vergroot word om 400 000 meer hoenders per week te kan slag en 250 meer mense in diens te neem. ’n Verdere 280 werkgeleenthede sal geskep word by die Mountain Valley-aanleg in KwaZulu-Natal deur twee skofte pleks van die huidige een te hê.
In die noordelike deel van Suid-Afrika sal bestaande boere wat hoenders op kontrak vir Astral grootmaak, na verwagting hul bedrywighede kan uitbrei, en in KwaZulu-Natal sal nuwe boere na verwagting nodig wees.
Nog ’n kapitaalprojek wat Astral beoog, is om op versoek van een kitskos-hoender restaurant groep ondermeer R 30 miljoen in outomatisering te belê.
Astral beplan ook ’n nuwe voeraanleg in Zambië, wat volgens mnr. Daan Ferreira, finansiële hoof, in die behoefte aan naspeurbaarheid sal voorsien. Dit sal sowat 20 000 ton voer per maand by die huidige 5 000 ton per maand voeg. Die voer sal hoofsaaklik vir kliënte van buite wees.
MEDEDINGING
Onder die redes vir die goeie resultate is dat die vergelykende tydperk se wins laag was, laer voerkoste, dat daar nie voorvalle van voël griep was nie en beter voer omsettings verhoudings danksy ’n nuwe voerprogram op sy plase.
Wat vooruitsigte betref, is daar volgens Ferreira in die algemeen nou beter sakevertroue en moontlikhede vir buitelandse belegging danksy pres. Cyril Ramaphosa se aanstelling.
Hy verwag egter strawwe mededinging van ander produsente wat produksie uitgebrei het, dat groot hoeveelhede hoender steeds ingevoer gaan word, veral uit Amerika en Brasilië, en dat voëlgriep in die winter ’n probleem kan wees.