UITVOER VAN LEWENDE DIERE TER SEE ‘ONAANVAARBAAR’
DIE rooivleisbedryf se komitee wat na die versorging van lewende hawe omsien, meen dat lewende diere nie meer vir slagdoeleindes ter see uitgevoer mag word nie en dat ’n formele verbod op dié praktyk ingestel moet word. Sommige handelaars voer soms lewende vee uit met die doel om die diere by ’n oorsese bestemming te laat slag. Volgens die komitee is dié praktyk geneig om onnodige en onvermydelike lyding van diere te veroorsaak.
Die komitee sê in ’n persverklaring daar is geen rasionele of aanvaarbare rede om vee oor lang afstande en vir lang tye in oorvol toestande met baie risiko’s te vervoer nie. Volgens die komitee sal Suid-Afrika se internasionale aansien daarby baat vind as hy ’n beginselvaste posisie jeens dié “onmenslike en onaanvaarbare” praktyk inneem.
Die gehalte van die vleis sal volgens die komitee ook deur dié praktyk geraak word. “Daar is geen rede waarom lewende diere nie volgens die voorgeskrewe reëls in SuidAfrika by ’n uitvoer-abattoir geslag kan word en die vleis dan in verkoelde vorm oorsee gestuur word nie,” lui die verklaring.
“Op dié manier word werkgeleenthede in Suid-Afrika geskep en voedselsekerheid bevorder.”
Van die basiese beginsels van dieresorg waaraan boere en abattoirs moet voldoen, sluit in gemak en skuiling, toegang tot vars water en ’n gesonde voerrantsoen, die teenwoordigheid van ander diere van dieselfde soort, die geleentheid om natuurlik op te tree, die voorkoming of vinnige behandeling van siektes en gepaste hantering.
Talle abattoir-eienaars, veral dié wat verkoelde en bevrore vleis uitvoer, besef die ekonomiese belangrikheid van diereregte. Hulle voldoen reeds aan die streng standaarde wat deur bedryfsorganisasies, invoerders en die Regering gestel word ten opsigte van dieresorg en die behandeling van diere voor hulle geslag word.