MIELIES SPEEL ‘TELEFOONTJIE’
Mieliesaailinge wat naby mekaar groei, gee ondergrondse seine af wat die groei van nabygeleë plante kan beïnvloed. Navorsing aan die Sweedse Universiteit van Landbou wetenskappe toon die verandering wat deur bogrondse, meganiese kontak tussen plante veroorsaak word, kan ondergrondse wisselwerking beïnvloed. Volgens die studieleier, dr. Velemir Ninkovic, kan dit dien as ’n voorspelling van ondergrondse mededinging tussen plante.
Plante het ingewikkelde, chemiese kommunikasie stelsels. Baie van dié boodskappe word in die vorm van chemiese middels deur die wortels in die grond afgeskei, wat deur die wortels van nabygeleë plante waargeneem word. Die afskeiding stuur boodskappe aan ander plante of hul bure familielede of vreemdelinge is, en plante kan dus hul groei daarvolgens bepaal.
Om die uitwerking van bogrondse interaksie op ondergrondse kommunikasiestelsels te ondersoek, het die navorsers mieliesaailinge onder druk geplaas en die groeiverandering in naburige saailinge bestudeer. Hulle het oor die mielieblare gevee om die aanraking van ’n naburige plantblaar na te boots en toe die chemikalieë wat die wortels afgeskei het, in die saailinge se groeimedium versamel. Nuwe plante wat in dieselfde groeimedium oorgeplaas is, het meer blare en minder wortels geproduseer as die kontroleplante.
Hulle het ook jong, ontkiemde mieliesaailinge getoets om te sien of hulle soortgelyke veranderinge kon waarneem in die groeimedium van plante wat versteur is en
dié wat onversteurd gelaat is. Die saailinge se hoofwortel het vinniger gegroei in die groeimedium van onversteurde plante, wat volgens Velemir en sy span aandui dat hulle tussen die twee mediums kon onderskei.
Die navorsers kon toon dat selfs kortstondige versteurings bogronds tot veranderinge in ondergrondse kommunikasie kon lei sodat plante gevolglik hul groeistrategie kon verander.
— FREDALETTE UYS
BRON: https://goo.gl/He5xmX