Maklike etes met eiervrug
Met hierdie donkerpers blinkskilvrug met sy sagte, roomkleurige vleis maak jy heerlike patee, kasserolgeregte en slaai.
Warm slaai met eiervrug, tamatie en feta
Sit hierdie gereg as slaai of bykos voor. Dit maak ook ’n heerlike vegetariese hoofgereg.
2 groot eiervrugte, in skywe gesny Sout 2 eiers, geklits 375 ml broodkrummels Olyfolie, vir braai 2-3 groot, ryp tamaties, in skywe gesny 2 wiele fetakaas, grof gekrummel Sout en vars gemaalde swartpeper na smaak 30 ml gekapte, vars pietersielie Vars suurlemoensap
Besprinkel die eiervrugskywe met sout en laat staan dit in ’n vergiettes vir ongeveer 10 minute. Spoel die sout goed af met skoon water en druk die eiervrugskywe met kombuispapier droog. Doop elke eiervrugskyf in geklitste eier en bedek met broodkrummels. Pak die gekrummelde eiervrugskywe op ’n bakplaat en laat staan vir 10 minute.
Voorverhit die oond tot 190 °C. Verhit ’n bietjie olyfolie in ’n pan oor matige hitte. Braai die eiervrugskywe daarin tot goudbruin en bros aan albei kante.
Smeer ’n oondvaste opdienbord met olyfolie. Pak die eiervrugskywe en tamatie afwisselend in ’n mooi patroon op die bord sodat die twee oorvleuel. Sprinkel die fetakaas oor en bak vir 15 minute tot die fetakaas en tamaties deurwarm en die eiervrugskywe bros is. Geur met sout en peper en sprinkel vars pietersielie en ’n paar druppels vars suurlemoensap oor. Sit dadelik voor. Lewer 4 porsies.
Eiervrugsmeer
Eiervrugsmeer of -patee se regte naam is baba ghanoush en is absoluut heerlik. Tradisioneel word die eiervrugte oor die vuur gerooster tot die vlees papsag is en ’n rokerige geur het voor dit saam met die res van die bestanddele verpulp word. Ek het dit vir die fotosessie sommer in die oond gerooster met ’n bietjie olyfolie en knoffel. Sit dit voor met kraak beskuitjies of vars brood of as deel van ’n mezzebord.
2 groot eiervrugte 1 heel knoffelbol Olyfolie 45 ml geroosterde sesamsaad Sap van 3 groot suurlemoene 3 ml geroosterde, fyn komyn Sout en peper na smaak
Voorverhit die oond tot 180 °C. Sny die eiervrugte in die lente deur en maak insnydings in die vlees. Sny die knoffelbol middeldeur (sodat elke knoffelhuisie oopgesny is. Bedruip die eiervrug, asook die knoffel, met olyfolie en pak dit (met die gesnyde kante na bo) in ’n oondbak. Bedek met foelie en bak vir ongeveer 20 minute. Haal die foelie af en haal die knoffel uit die bak. Laat afkoel. Sit die bak met die eiervrug terug in die oond en bak vir ’n verdere 10-20 minute tot die eiervrug papsag is. Haal uit die oond en laat afkoel. Skep die eiervrugvlees uit die skil en in ’n voedselverwerker. Druk die saggeroosterde knoffel uit die knoffelhuisies en voeg die puree by die eiervrug. Voeg die res van die bestanddele by en pols tot ’n puree vorm. Proe vir geur en voeg sout en peper na smaak by. Skep in ’n opdienbak en drup olyfolie oor. Lewer 500 ml eiervrugsmeer.
Mediterreense eiervrugbredie
Dié gereg herinner aan ratatouille, maar bevat ook olywe en proteïenryke droëbone. Jy kan na hartelus rondspeel met groente kombinasies, maar ek hou van die bone hierin omdat dit so goed by die geure van komyn en koljander pas.
90 ml olyfolie 1 ui, grof gekap 3 knoffelhuisies, fyn gedruk 5 ml koljander 5 ml komyn 750 ml gesnipperde eiervrug, gesout, goed afgespoel en droog gedruk 1 blik (410 g) gekapte tamaties
Tamatieblik vol water 1 blik (410 g) bone van jou keuse 125 ml ontpitte calamata-olywe Sout, swartpeper en suiker na smaak Vars pietersielie, om voor te sit
Verhit die olie en braai die ui, knoffel en speserye daarin tot die ui sag is. Voeg die eiervrug by en braai vir ’n paar minute. Voeg die tamaties en water by en verhit tot kookpunt. Prut vir 15 minute. Voeg die bone en olywe by en prut tot die sous afgekook en geurig is. Geur na smaak met sout, peper en ’n knippie suiker. Sprinkel vars pietersielie oor en sit warm voor. Lewer 6 porsies.
Stampk oringslaai met geroosterde eiervrug en soetrissie
Eiervrug is ’n goeie pasmaat vir peulgroente, maar ook vir stampkoring. Hierdie slaai is propvol aardse geure en interessante teksture. Omdat eiervrug en stampkoring geure so goed absorbeer, is dit raadsaam om die slaai ’n dag vooraf voor te berei sodat die geure lekker deur die slaai kan trek voor dit voorgesit word.
2 eiervrugte, in blokkies gesny en met sout besprinkel 5mlfynkomyn 1 elk groot rooi en geel soetrissie, pitte verwyder en in stukkies gesny 750 ml gaar stampkoring, goed gedreineer en afgekoel 3 ryp tamaties, pitte verwyder en in klein blokkies gesny Hand vol vars pietersielie, fyn gekap 10 ml fyngekapte, vars kruisement Sout en vars gemaalde swartpeper Slaaisous
30 ml wit druiweasyn 2 ml sout 10 ml Dijonmosterd 90 ml olyfolie Vars gemaalde swartpeper Paar druppels heuning
250 ml mengsel van neute en sade van jou keuse, liggies gerooster
Voorverhit die oond tot 200 °C. Spoel die gesoute eiervrug blokkies goed af en druk droog. Sit die eiervr ugblokkies saam met die soetrissies in ’n oondbak en besprinkel met ’n bietjie olyfolie. Sprinkel nou die komyn oor en geur liggies met sout. Oondrooster vir ongeveer 12-15 minute tot gaar. Haal uit die oond en laat afkoel tot kamertemperatuur.
Meng die stampkoring met die tamatieblokkies en fyngekapte, vars kruie. Voeg die geroosterde groente by en meng deur. Klits ál die bestanddele vir die slaaisous goed saam en giet oor die slaai. Meng deur. Bedek en verkoel vir minstens 2 uur. Haal die slaai ’n uur voor dit voorgesit moet word uit die yskas en sprinkel die mengsel van geroosterde neute en sade oor. Sit dadelik voor. Lewer 8 porsies.